Tońdym dep bireýdiń kóligin aıdap ketken azamat ustaldy
TALDYQORǴAN. QazAqparat - Almaty oblysynda sýyq aıazda tońyp kettim degen jeleýmen bireýdiń kóligin minip ketken azamat ustaldy, dep habarlaıdy QazAqparat tilshisi.
Polıtsııa qyzmetkerleri «Mazda-626» markaly kóligin zańsyz ıemdengen 30 jastaǵy Úsharal qalasynyń turǵynyn qolǵa túsirdi. Túsinikteme berý kezinde kúdikti aıazdy kúni úıine jaıaý qaıtqysy kelmeı kózine birinshi túsken kólikti aıdap ketýine májbúr bolǵan. Ol symdardy bir-birine tıgizý arqyly temir tulpardy otaldyryp júrgizgen. Biraq dittegen jerine jete almaı qalǵan. Sebebi patrýldik polıtsııa qyzmetkerleri aldynan shyǵa kelgen.
Kólikti zańsyz ıemdený faktisi boıynsha QR QK 200-shi baby boıynsha qylmystyq is qozǵalyp, avtokólik zańdy ıesine qaıtaryldy. Al kúdiktige bultartpaý sharasy qoldanyldy.
Aıta ketý kerek, jyl basynan beri tártip saqshylary tórt avtokólik urlaǵan azamatty qolǵa túsirgen.
