Tońazytqyshtan tabylǵan óli balalarǵa qatysty is boıynsha sot bastaldy
ALMATY. QazAqparat - Almatyda balalaryn býyndyryp óltirgen almatylyq erli-zaıyptylardyń isi boıynsha aldyn ala sot tyńdaýy bastaldy, dep habarlaıdy QazAqparat tilshisi sot zalynan.
Іsti qylmystyq ister boıynsha mamandandyrylǵan aýdanaralyq sotynyń sýdıasy Bolatov Erlan qarap jatyr.
Zań aldynda 1 jastan endi asqan eki búldirshindi óltirgen erli zaıyptylar Emıl Gılmýtdınov pen Alla Volchenko jaýap berýde. Olarǵa QR QK 99-babynyń 2-bólimi, 119-babynyń 1-bólimi boıynsha aıyp taǵyldy.
Sot otyrysynda Alla Volchenko BAQ ókilderin qatystyrmaýdy surady.
«Meniń balam ósip kele jatyr. Sondyqtan jýrnalısterdiń qatysqanyn qalamaımyn», -dedi Alla Volchenko.
Emıl Gılmýtdınov ta sot protsesine jýrnalısterdiń qatysqanyna qarsylyǵyn bildirdi.
Jantúrshigerlik oqıǵa osydan eki aı buryn Túriksib aýdanynda bolǵan. Kóppáterli úılerdiń birinde tońazytqyshtyń ishinen óli sábıler tabyldy.
Eki ul balanyń ólimi mehanıkalyq asfıksııadan bolǵany anyqtaldy.
Keıin olardy týǵan ákesi Emıl býyndyryp óltirgeni belgili boldy. Sosyn múrdelerdi tońazytqyshqa salyp ketken. Er adam sotta istegenin moıyndap, balalardyń jylap uıqy bermegenin aıtqan. Bul iske erli-zaıypty ózara kelisimmen barǵan.
Keıin balalardyń anasy Alla Volchenko men kúıeýi úlken uldary Ravıldi Samal shaǵyn aýdanyndaǵy aýlalardyń birinde qańǵyrtyp tastap ketken.
Bala aýlada 3 kún júrgen kórinedi.
2-3 jastaǵy Ravıldi Samal shaǵyn aýdanyndaǵy aýlalardyń birinde adamdar taýyp alyp polıtsııa shaqyrǵan. Keıinirek polıtsııa olardy mas kúıinde taýyp alǵan.
