Tońazytqyshtan tabylǵan múrdeler: Tiri qalǵan balamen psıhologtar jumys jasap jatyr
ALMATY. QazAqparat - Almaty dárigerleri tońazytqyshtan tabylǵan balalardyń tiri qalǵan baýyrynyń densaýlyǵy týraly aıtyp berdi.
Qazir Rafıl Volchenko №2 qalalyq balalar aýrýhanasynda bólimshede jatyr.
2 jastaǵy balanyń psıho-motorlyq damýy kesheýildep qalǵan.
«Bala sóılemeıdi. Biraq aıtqandy túsinedi. Psıho-motorlyq damýy artta qalǵan. Bul pedagogıkalyq turǵydan kómektiń bolmaǵandyǵyn kórsetedi. Balamen otbasynda eshkim sóılespegen. 2 jastaǵy bala jaqsy sóıleýi kerek. Qazir balamen psıholgtar, nevropatologtar jumys jasap jatyr», - dedi Almaty qalalyq Densaýlyq saqtaý basqarmasynyń Ana men bala densaýlyǵyn qorǵaý bóliminiń basshysy Ásel Bısenbaeva.
Mamannyń aıtýynsha, qazir balaǵa týysqandary kelmeıdi. Sebebi, kezdesýdiń bári tergeýshiniń ruqsatymen júzege asady. Tergeýshi tergeý amaldary bitkenshe tyıym salǵan.
Sonymen qatar, sot sheshimi shyqqanǵa deıin Ravıl Balalar úıine jiberiledi.
«Aýrýhanadan shyqqan soń balany balalar úıine rásimdeımiz. Balalar úıinde Ravıl ońaltý kýrsynan ótedi», - dedi Ásel Bısenbaeva.
Aıta ketý kerek, 2-3 jastaǵy Ravıldi Samal shaǵyn aýdanyndaǵy aýlalardyń birinde adamdar taýyp alyp polıtsııa shaqyrǵan.
Bala aýlada 3 kún júrgen kórinedi. Uldy ákesi men sheshesi Alla Volchenko men Ravıl Gılmýtdınov ákep tastap ketken. Keıinirek polıtsııa olardy mas kúıinde taýyp alǵan.
Belgili bolǵandaı, erli-zaıyptylar qanquıly qylmysqa qatysy bar bolyp shyqty.
Balalardyń aıǵaıshýynan sharshaǵan otaǵasy eki kishkentaı ulyn býyndyryp, jaldamaly páterlerdiń birinde tońazytqyshqa salyp ketken. Bul iske olar ózara kelisimmen barǵan. Al úlken uldary Ravıldi qalada qańǵyrtyp jiberip, qutylmaq bolǵan.
Qazir erli-zaıyptylar qamaýǵa alyndy.
