Tońazytqyshtan tabylǵan balalardy ógeı ákesi óltirýi múmkin
ALMATY. QazAqparat - Almatyda eki balany óltirdi degen kúdikpen 29 jastaǵy Ózbekstan azamaty ustaldy, dep habarlaıdy QazAqparat tilshisi qalalyq ІІD baspasóz qyzmetine silteme jasap.
Er adam qaıtys bolǵan balalardyń anasymen azamattyq nekede turǵan. Onymen birge qazir balalardyń anasynan jaýap alynyp jatyr.
«Qazir atalǵan derekke baılanysty protsessýaldy jáne tergeý amaldary jalǵasýda. Kúdikti óz kinásin moıyndap otyr. Sotqa deıingi tergeý óndirisinde qajetti saraptamalar taǵaıyndalady. Búgin ǵana polıtsııa balalardyń anasy azamatsha Volchenkoǵa izdeý jarııalaǵan bolatyn», - dedi qalalyq ІІD tergeý basqarmasynyń basshysy Rýstam Abdrahmanov.
Polıtsııa anasymen birge joǵalyp ketken úlken balasyn da taýyp alyp, medıtsınalyq mekemege tekserýge jiberdi.
Aıta ketý kerek, búgin 34 jastaǵy Alla Volchenkoǵa izdeý jarııalanǵan bolatyn. Keıin belgili bolǵandaı, onyń balalary Túrksib aýdanyndaǵy bir páterlerdiń birinde tońazytqyshtan tabyldy. Al anasy men úlken balasy úıde bolmaǵan.
Otbasy kózden ǵaıyp bolǵan soń kórshileri úıdi buzyp kirgen.
