Tońazytqyshtan óli tabylǵan egizderdiń aǵasy Ózbekstanǵa jiberildi
ALMATY. QazAqparat - Almatyda áke-sheshesinen tirideı, baýyrlarynan ólideı aırylǵan Ravıl Volchenkony ájesi Nurııa Gılmýtdınova Ózbekstanǵa alyp ketti. Bul týraly qalalyq Bilim basqarmasynyń qamqorshylyq jáne qorǵanshylyq bóliminiń mamandary QazAqparat agenttiginiń arnaıy saýalyna jaýabynda aıtty.
Ravıldiń egiz baýyryn ata-anasy tunshyqtyryp óltirgen bolatyn. Qańǵyryp júrgen balany qala turǵyndary taýyp alyp, arnaıy organdarǵa jetkizgen.
Osy ýaqytqa deıin bala qaladaǵy balalar úıiniń birinde turyp kelgen.
Jaqynda Medeý aýdandyq qorǵanshylyq pen qamqorlyq bólimi balany ájesine berdi.
«2018 jyldyń 19 aqpanynda № 06-03/52 Medeý aýdany ákiminiń ókimimen 2015 jyldyń 29 mamyrynda týylǵan Volchenko Ravıl Emılulyna ájesi Gılmýtdınova Nurııa Shakırovna qamqorshy retinde bekitildi. Osy maqsatta birqatar shara jasaldy. Ájesi men nemeresiniń týystyq qatynasyn dáleldeıtin DNQ taldaýy jasaldy. Qorytyndyǵa sáıkes, Gılmýtdınova Nurııa balanyń ájesi ekendigi dáleldendi», - dedi qalalyq Bilim basqarmasynan.
Sonymen qatar, 2018 jyldyń 3 naýryzynda Medeý aýdany qorǵanshylyq jáne qamqorshylyq organy Volchenko Alla Aleksandrqyzyn ata-analyq quqyǵynan aıyrý týraly sotqa talap aryz berdi.
Eske sala ketsek, 11 qyrkúıekte jantúrshigerlik oqıǵa Túriksib aýdanynda bolǵan. Kóppáterli úılerdiń birinde tońazytqyshtyń ishinen sábılerdiń múrdesi tabyldy. Sol kúni Medeý aýdanynda adasyp júrgen eki jastaǵy er bala polıtsııaǵa jetkizildi. Bala ólgen egizderdiń aǵasy ekeni anyqtaldy. Egizderdiń ólimine kúdikti retinde olardyń ata-anasy ustaldy.
15 jeltoqsanda Alla Volchenko - 18 jylǵa, Emıl Gılmýtdınov 20 jylǵa bas bostandyǵynan aıryldy.
Illıýstratıvnoe foto s saıta o.aolcdn.com
