Tońazytqyshta bir jyl saqtalatyn alma shyǵaryldy
NUR-SULTAN. QazAqparat - AQSh-ta tońazytqyshta bir jyl saqtalsa da búlinbeıtin jańa alma surpy satyla bastady, dep habarlaıdy QazAqparat BBC-ge silteme jasap.
Jańa almany suryptap shyǵarýǵa 20 jyl ketken. Cosmic Crisp dep atalatyn almany Vashıngton shtatynyń ýnıversıteti ǵalymdary Honeycrisp jáne Enterprise gıbrıd sorttarynan alǵash ret 1997 jyly shyǵarǵan.
Vashıngton shtatynyń fermerleri bul surypty aldaǵy 10 jyl tek qana ózderi ósirýge eksklıýzıv quqyq alǵan.
«Bul qatty ári nárli qyshqyl-tátti dámi bar alma», - deıdi ýnıversıtettiń osy sortty selektsııalaý baǵdarlamasyn basqarǵan Keıt Evans.
Onyń aıtýynsha, alma tońazytqyshty 10-12 aı saqtaý kezinde óziniń qyzyl túsi men keremet dámin óte baıaý joǵaltady.
Qazirgi ýaqytta shtatta osy almanyń 12 mıllıon túp aǵashy egilgen. Alaıda lıtsenzııa júıesiniń qatań talaby ony Vashıngton shtatynan basqa jerde ósirýge ruqsat bermeıdi.
Bastapqyda alma túri WA38 dep belgilengen, keıin túngi juldyzdy aspanǵa uqsaıtyn aq daqtary kóp bolǵandyqtan Cosmic Crisp dep atalǵan.
