Tomoterapııa eshqaıda joǵalǵan joq - DSM kópshilik suraý salǵan máselege qatysty málimdeme jasady
ASTANA. KAZINFORM – Densaýlyq saqtaý mınıstrligi áleýmettik jeliler men buqaralyq aqparat quraldarynda kóterilgen tomoterapııanyń qoljetimdiligine qatysty máselege túsinikteme berdi.
Vedomstvonyń málimetinshe, Qazaqstanda medıtsınalyq kórsetilimderi bar barlyq patsıent sáýlelik terapııany tolyq kólemde alýdy jalǵastyryp jatyr.
Mınıstrlik tomoterapııanyń emdeýdiń jeke túri emes, qazirgi zamanǵy qashyqtyqtan sáýlelik terapııa ádisteriniń biri ekenin atap ótti. Sońǵy jyldary tehnologııalardyń damýyna baılanysty buryn tomoterapııalyq apparattarda oryndalǵan kóptegen emdeý mindetteri qazirgi zamanǵy syzyqtyq údetkishter arqyly tıimdi júzege asyrylady.
Emdeý tásili jabdyqtyń ataýyna emes, halyqaralyq klınıkalyq usynymdarǵa, isiktiń ornalasýyna, aýrýdyń satysyna jáne patsıenttiń jeke erekshelikterine qaraı dárigerler konsılıýmynyń sheshimimen belgilenedi.
– Tomoterapııa eshqaıda joǵalǵan joq. Tehnologııalar men jabdyqtardyń múmkindikteri ózgerdi. Qazirgi zamanǵy syzyqtyq údetkishter joǵary dáldiktegi sáýlelik terapııanyń barlyq derlik spektrin júrgizýge múmkindik beredi, al birqatar klınıkalyq mindetter boıynsha olardyń múmkindikteri odan da keń. Patsıent úshin apparattyń ataýy emes, durys tańdalǵan emdeý taktıkasy, sapaly josparlaý jáne mamandar komandasynyń kásibı biliktiligi basty mánge ıe, – dedi Qazaq onkologııa jáne radıologııa ǵylymı-zertteý ınstıtýtynyń Radıatsııalyq onkologııa ortalyǵynyń basshysy, medıtsına ǵylymdarynyń doktory Vıktor Kım.
Mınıstrliktiń málimetinshe, búginde Qazaqstanda sáýlelik terapııaǵa muqtaj barlyq patsıent, sonyń ishinde balalar da tegin medıtsınalyq kómektiń kepildik berilgen kólemi aıasynda joǵary tehnologııalyq medıtsınalyq kómekti tegin alady.
Elimizdiń barlyq derlik óńirinde zamanaýı syzyqtyq údetkishter ornatylǵan. Qaraǵandy men Semeıde eki-ekiden apparat jumys istese, Astanadaǵy Ulttyq ǵylymı onkologııa ortalyǵynda tórt, qalalyq onkologııalyq ortalyqta taǵy eki apparat qoldanylady.
– Sońǵy eki jylda Qazaqstanda onkologııalyq patsıentterdi sáýlelik terapııamen qamtý kórsetkishi 60%-ǵa jýyqtady. Bul damyǵan Eýropa elderiniń deńgeıimen shamalas. Biz árbir patsıenttiń tıimdi ári qaýipsiz emdi ýaqytyly alýyn qamtamasyz etý úshin onkologııalyq qyzmetti damytýdy, jabdyqtardy jańartýdy jáne zamanaýı tehnologııalardy engizýdi jalǵastyramyz, – delingen Densaýlyq saqtaý mınıstrliginiń habarlamasynda.
Aıta keteıik, elde telemedıtsınalyq qyzmetterdiń úlesi 9,4 paıyzǵa jetti.
