«Tomırıs» tarıhı fılminde basty róldi somdaıtyn aktrısa belgili boldy
ASTANA. QazAqparat - Qazaqstanda túsirilip jatqan «Tomırıs» tarıhı fılminde bas keıipkerdi somdaıtyn aktrısanyń esimi anyqtaldy. Bul týraly túsirilip jatqan týyndynyń rejısseri Aqan Sataev óziniń Instagramdaǵy paraqshasynda jazdy, dep habarlaıdy «QazAqparat» HAA tilshisi.
«Dostar, sizderdiń nazarlaryńyzǵa bizdiń «Tomırıs» tarıhı fılminiń bas keıipkerin zor qýanyshpen tanystyra ketkimiz keledi. Álmıra Tursyn. 1990 jylǵy. Psıholog Koých», - dep jazady rejısser.
Rejısserdyń jazýynsha, 27 naýryz kúni kastıng-dırektor onyń Instagram paraqshasyna habarlama qaldyrǵan.
«12 mamyr kúni Astanada ótken jalpyqazaqstandyq kastıngte ol irikteýge - kastıngtiń birinshi týryna keldi. Qyrkúıek aıynda rejısserlik vıdeosynaq ótti - ol 2-shi týr edi. Nátıjesinde, úmitkerler salt atpen júrý men sahnalyq shaıqasty meńgerý kýrsy úshin jattyǵý lagerine jiberildi. Qazan-qarasha aılarynda jattyǵý lagerinde boldy. Ol úshinshi týr bolatyn», - deıdi ol.
Habarlamada jazylǵanyndaı, jeltoqsan aıynda bas prodıýsser Álııa Nazarbaeva men rejısser Aqan Sataev róldi bekitken.
«Qazirgi ýaqytta túsirilim toby departamentiniń basshylary men trıýktardy oryndaýshylarmen, akterlik sheberlik boıynsha mamandarmen jumys jalǵasyn tabýda. Bul Álmıranyń úlken kınodaǵy debıýti bolmaq», - dep jazady Aqan Sataev.
Eske sala ketsek, ótken jyly Sháken Aımanov atyndaǵy «Qazaqfılm» AQ «Sataıfılm» kınokompanııasymen birlesip, «Tomırıs» aýqymdy tarıhı jobasy boıynsha jumysqa kirisken bolatyn. Fılm QR Mádenıet jáne sport mınıstrliginiń tapsyrysymen túsirilip jatyr. Bas prodıýseri - Álııa Nazarbaeva («Anaǵa aparar jol»). Fılmniń qoıýshy rejısseri - Aqan Sataev («Reketır», «Adasqan», «Lıkvıdator», «Jaýjúrek Myń Bala», «Anaǵa aparar jol»).
