«Tomırıs» Parıjdegi kınofestıvalde top jardy

NUR-SULTAN. QazAqparat – «Qazaqfılm» kınostýdııasy túsirgen «Tomırıs» kınotýyndysy Parıjde ótken 26-shy L’Etrange Festival kınofestıvaliniń tolyq metrajdy fılmder sektsııasynda Nouveau Genre gran-prıin jeńip aldy. Qazaqstan kınematografııasy úshin mundaı qýanyshty jańalyqty fılmniń rejısseri Aqan Sataev bólisti, dep habarlaıdy QazAqparat tilshisi.

«Dostar, qýanyshty jańalyqty bólisýge asyqpyz! «Tomırıs» kınotýyndysy Parıjde ótken 26-shy L’Etrange Festival kınofestıvaliniń tolyq metrajdy fılmder sektsııasynda Nouveau Genre gran-prıin jeńip aldy. Festıval seriktesteriniń biri, álemdegi eń iri frantsýz tilindegi aqyly telearna CANAL+ bizdiń fılmdi praım-taımda kórsetedi» dep jazdy Aqan Sataev Instragram paraqshasynda.

Eske sala keteıik, byltyr jaryqqa shyqqan kınotýyndy bizdiń zamanymyzǵa deıingi VI ǵasyrda bolǵan oqıǵany sýretteıdi.

Fılmde kishkentaı qyzdan aıbyndy jaýyngerge aınalǵan, jaqyndarynan aırylyp, satqyndardan óshin alǵan jáne saq taıpalaryn biriktirgen uly dalanyń aty ańyzǵa aınalǵan Tomırıs patshaıymynyń taǵdyry baıandalady.

Fılm QR Mádenıet jáne sport mınıstrliginiń tapsyrysymen «Qazaqfılm» kınostýdııasynda Sataifilm kompanııasynyń qatysýymen túsirilgen. Álııa Nazarbaeva bas prodıýser bolǵan fılmge Aqan Sataev rejısserlik etken.

Fılmniń basty rólderinde Almıra Tursyn, Ádil Ahmetov, Azamat Satybaldy, Erkebulan Daıyrov, Berik Aıtjanov, Aıan Ótepbergen, Asylhan Tólepov syndy akterler oınady.