«Tomırıs», «Paralımpıets»: Seýlde Qazaqstan kınosy kúnderi bastaldy
ASTANA. KAZINFORM — Prezıdent Qasym-Jomart Toqaevtyń Koreıa Respýblıkasyna memlekettik sapary aıasynda Seýlde Qazaqstan kınosy kúnderi bastaldy. Koreıalyq kórermenge «Tomırıs», «Paralımpıets» jáne «Almaty, ıa lıýblıý tebıa» fılmderi usynyldy. Bul týraly Mádenıet jáne aqparat mınıstrligi habarlady.
Saltanatty ashylý rásimine Mádenıet jáne aqparat mınıstri Arman Qyryqbaev, Koreıa mádenıet qaýymdastyǵynyń prezıdenti Samýel Chon, sondaı-aq Qazaqstannyń kıno salasynyń ókilderi qatysty.
Arman Qyryqbaev eki el arasyndaǵy yntymaqtastyqtyń qarqyndy damyp kele jatqanyn atap ótip, mádenı baılanystardyń aıryqsha mańyzyna toqtaldy.
— Búginde Qazaqstan men Koreıa arasyndaǵy qarym-qatynas kóptegen baǵytta, sonyń ishinde mádenıet salasynda da qarqyndy damyp keledi. Memleket basshysynyń Koreıa Respýblıkasyna memlekettik sapary barysynda aýqymdy mádenı baǵdarlama uıymdastyrylyp otyr. Baǵdarlama boıynsha Qazaqstan kınosy kúnderimen qatar, Seýlde Kazakhstan–Korea Cultural Village festıvali ótedi. Onda Qazaqstannyń mádenı murasy, dástúrli jáne zamanaýı óneri tanystyrylady. Bul is-sharalar mádenıet salasyndaǵy yntymaqtastyqqa tyń serpin berip, halyqtarymyzdy odan ári jaqyndastyra túsetinine senimdimin, — dedi Arman Qyryqbaev.
Kıno óneri — eki eldiń mádenı baılanysyndaǵy mańyzdy baǵyttardyń biri. Qazaqstandyq fılmder Koreıa Respýblıkasynda ótetin iri halyqaralyq kınofestıvalderdiń baǵdarlamasynan turaqty oryn alyp keledi. Máselen, 2025 jyly rejısser Jannat Álshanovanyń «Pobedıteleı vıdno na starte» fılmi Pýsan halyqaralyq kınofestıvaliniń baǵdarlamasyna endi.
Seýlde kórsetilgen týyndylar Qazaqstannyń san qyrly bolmysyn tanytady. «Tomırıs» tarıhı dramasy Uly dala murasyn arqaý etse, «Almaty, ıa lıýblıý tebıa» zamanaýı qalanyń tynys-tirshiligin kórsetedi. Al «Paralımpıets» ómirdiń aýyr synaqtaryna moıymaı, qıyndyqtardy eńsere bilgen jannyń taǵdyryn baıandaıdy.
Baǵdarlama aıasynda Qazaqstannyń kıno salasynyń ókilderi koreıalyq kórermenmen kezdesip, fılmderdiń túsirilý tarıhy men elimizdegi kıno óneriniń damýy týraly áńgimeledi. Sondaı-aq taraptar eki eldiń kıno mamandary arasyndaǵy kásibı jáne shyǵarmashylyq baılanysty odan ári keńeıtýdiń múmkindikterin talqylady.
Buǵan deıin Arman Qyryqbaev otandyq kıno salasynyń damýy, «Qazaqfılmniń» bolashaǵy jáne ulttyq fılmderdi qoldaý sharalary týraly aıtty.
