«Tomırıs» fılminiń qazaq tilindegi nusqasy kórsetile bastady
NUR-SULTAN. QazAqparat - «Tomırıs» fılminiń qazaq tilindegi nusqasy kınoteatrlardan kórsetile bastady, dep habarlaıdy QazAqparat.
Bul týraly fılmniń rejısseri Aqan Sataev óziniń Instagram paraqshasynda jazdy.
«Dostar, búginnen bastap, «Tomırıs» fılminiń tolyq qazaqsha nusqasyn bizdiń «Meloman» dıstrıbıýtor kompanııamyz kınoteatrlarǵa tarata bastady. Kınomyzdyń qazaqsha nusqasyn kútip qalǵandaryńyz úshin, shyn júregimizden keshirim suraımyz», - dep jazdy rejısser.
Aıta keteıik, áleýmettik jeli qoldanýshylary týyndynyń tek qana orys tilinde júrip jatqanyn aıtyp, qazaq kınosynyń qazaq tilinde kórsetilmeýine narazylyq bildirgen edi.
Rejısser fılmniń qazaq tilinde dybystalǵan nusqasy bar ekenin, tıtrlerdi latyn álipbıinde jazǵanda grammatıkalyq qateler ketkenin túsindirdi.
«Top músheleri men akterlerdiń aty-jóni qujatqa sáıkes kelmeýine baılanysty keshiktirilip jatyr. Quqyqtyq turǵydan biz kartınany mundaı qatelerimen kórsetilimge jibere almaımyz. Shuǵyl túrde atalmysh máseleni sheship jatyrmyz», - dedi A. Sataev.
Tarıhı dramada kishkentaı Tomırıstiń Saq patshaıymy laýazymyna deıingi ómir joly kórsetiledi. Onda Saq taıpalarynyń Parsy patshasy Kırge qarsy joryǵy kórinis tapqan jáne keıipkerler ejelgi túrki, ejelgi parsy tilderinde sóıleıdi.
Oǵan elimizdiń tanymal kınojuldyzdary Dımash Ahımov, Erik Joljaqsynov, Baıkenje Belbaev, Berik Aıtjanov, Erkebulan Daıyrov, Murat Bısembın, Azamat Satybaldy, Ádil Ahmetov, Aıjan Laıdjı, Aıan Ótepbergen, Asylhan Tólepov, Ashat Úrpekovter túsken.
Fılm 27 qyrkúıekte prokatqa shyqty.
