«Tomırıs» fılminiń basty keıipkeri Almıra Tursyn túsirilimderdi aıaqtady
ASTANA. QazAqparat - Aqan Sataevtyń «Tomırıs» aýqymdy tarıhı týyndysynyń basty keıipkeri Almıra Tursyn jobadaǵy túsirilimderin aıaqtady. Bul týraly fılm rejısseri Instagramda habarlady.
«Búgin bizdiń «Tomırıs» jobamyzda fılmniń basty keıipkeri Almıra Tursyn túsirilimderdi aıaqtady.
Keremet somdalǵan beıne úshin, kınoǵa degen mahabbat úshin jáne jumysqa jan-tánimen berilgendigi úshin alǵys bildiremin»,-dep jazdy Aqan Sataev.
Eske sala ketsek, almatylyq Almıra Tursyn mamandyǵy boıynsha psıholog jáne tulǵalyq damý jónindegi jattyqtyrýshy.
Aqpan aıynyń basynda, tarıhı fılmde basty rólge bekitilgennen keıin ol halyqqa keńinen tanymal bola bastady. A. Tursynnyń massagetter patshaıymy beınesindegi sýreti Qaznet arqyly tarap, boıjetken qazaqstandyq sulýlyqtyń etalonyna aınaldy.
