«Tomırıs» fılminen 480 mln teńge tabys tústi

NUR-SULTAN, QazAqparat – «Tomırıs» fılminiń prokatynan búgingi tańda 480 mıllıon teńge tabys tústi. Bul týraly QR Mádenıet jáne sport mınıstri Aqtoty Raıymqulova aıtty, dep habarlaıdy QazAqparat tilshisi.

«Elimizde fılm respýblıka boıynsha kún saıyn 800 ret kórsetiledi. Fılmnen túsken qarajat búginde 480 mıllıon teńgeni qurady. Bul qarajat bıýdjetke jáne bizdiń kıno ónerimizdi damytýǵa jumsalady», - deıdi mınıstr.

Sonymen qatar, mınıstr bul fılm halyqaralyq kınofestıvalderge usynylatynyn jetkizdi.

«Tomırıs» otandyq kınoındýstrııanyń alǵa jyljyǵanyn kórsetedi. Buryn Qazaqstanda túsirilgen fılmder básekege qabiletsiz bolatyny týraly jıi aıtylatyn. Endi biz osy syndy eńserip, jańa baǵytta damı bastadyq», - deıdi Aqtoty Raıymqulova.

Eske sala ketsek, buǵan deıin QR Mádenıet jáne sport mınıstri «Tomırıs» fılmi aldymen qazaq tilinde kórsetilmegeni úshin keshirim suraǵan edi.