«Tomırıs» fılminde basty róldegi aktrısa birinshi suhbatyn berdi

27 jasar almatylyq A. Tursyn oqyǵan mamandyǵy boıynsha psıholog. Aqpan aıynda onyń atalǵan tarıhı fılmde bas keıipkerdi somdaıtyny belgili boldy. Sol kezde patshaıym kıimindegi aktrısanyń fotosýretteri ınternet jelisinde keńinen tarap ketken edi.

- Almıra, qol jetkizgen basty rólińizben quttyqtaımyn. Siz osyǵan deıin kınoǵa túsip kórmepsiz. Osy kastıng jaıynda qaıdan bildińiz?  

- Men bul jaıynda áleýmettik jelidegi paraqshamnan bildim, ıaǵnı onda meni tarıhı kartınada keıipkerdi somdaý úshin synaqtan ótkizýge shaqyrdy. Bastapqyda bul usynysqa qalaı áreket etýdi bilmeı, oılanyp qaldym. Buǵan deıin kınoǵa jáne qazaqstandyq iri jobalarǵa da shaqyrtý alǵan edim, alaıda osy usynystarǵa asa mán bermeı keldim. Men olardan bas tarttym, ıaǵnı keıde keıipkerler maǵan sáıkes bolmady nemese jumystan qolym bosamady. Tomırıs tulǵa retinde maǵan qyzyq boldy. Sondyqtan osy rólde ózimdi synap kórgim keldi. Osy oraıda kásibı mamandardyń talaptaryna sáıkes kelgenime qýanyshtymyn.

-  Sizdi basty rólge bekitkeni jaıynda aqparat taraǵannan keıin, 16 aqpanda jarııalanǵan fotosýretter jelide aıtarlyqtaı tanymaldyqqa ıe boldy. Birneshe apta boıy elimizde siz jaıynda aıtylyp júrdi. Bul turǵyda osy jaıt qalaı áser etti?  

- Meniń áleýmettik jelidegi paraqshamdy buǵattap tastaǵan kezde ǵana kópshiliktiń nazaryna ilikkenimdi alǵash túsindim. Maǵan adamdar telefon shalyp, habarlamalar jiberip jatty. Birinshi bolyp meni týystarym men dostarym quttyqtady. Olar únemi barlyq bastamalarymdy qoldap júredi. Qazirgi kezde ózimdi tolyqtaı «Tomırıs» jobasyna arnadym.

Nazarymdy basqaǵa sharalarǵa aýdarmas úshin suhbattardan da bas tarttym. Túsirilim kezinde koýchıngti de toqtata turýǵa týra keldi. Sondyqtan osyndaı qarbalas sátte aıtarlyqtaı tanymaldyqty sezinip turǵanym joq. Degenmen de quttyqtaýlar jazylǵan hattar men habarlamalar áli de kelip jatyr.

-  Túsirilim protsesine birden qosylyp kettińiz be? Álde akterlik tájirıbeńiz bolmaǵandyqtan, bastapqyda qıyndyqtar týyndady ma?

- Men úshin tańsyq salalardy zertteý únemi qyzyq bolatyn. Ázirge ózimniń kınodaǵy áserim týraly aıtý qıyndaý. Biraq ta bul jańashyldyqtar óte qyzyq bolyp tur. Ynta men qyzyǵýshylyq bolǵan kezde, túsirilim barysynda barlyq protsesten kóńil kóteresiń. Sáıkesinshe, barsha qoıylǵan talaptardy ońaı eńserip kelemin. Endi osy qulshynystyń nátıjesine kınonyń tusaýkeserinde baǵa berersizder.

- Sizdiń osyǵan deıingi kásibińiz akterlik oıynǵa kómektese aldy ma?

- Mende jańa keıipkerdi somdaýda erekshe ádisim joq. Obrazǵa kirýge tarıhı kostıýmder kómektesedi, ıaǵnı olardyń barlyǵy óte tamasha daıyndalǵan. Durys tańdalǵan mýzyka men stsenarıdi jete túsiný mańyzdy dep bilemin. Psıholog retinde Tomırıstiń jeke tulǵasyn zerttedim. Basty keıipkerdiń amaldary men is-qımyly sebepterin túsiný úshin psıhologııalyq ádisterge súıendim. Sondyqtan psıhologııanyń kómegi boldy.

 - Sizdiń ústińizdegi jaýynger qyzdyń kıimin baıqap turmyn. Ózińizge unaı ma?

- Árıne, óte unaıdy. Túsirilimge arnap maǵan kıimniń birneshe úlgisi daıyndaldy. Kostıýmderdiń ereksheligi tańdandyrmaı qomaıdy, olardyń barlyǵy tabıǵı bylǵarydan nemese maqtadan jasalǵan. Osy kıimderdi kıgen kezde, sol dáýirge túskendeı áser alasyń. Atap ótkenimdeı, bul kostıýmder obrazǵa kirýge shynymen de kómektesedi. Jalpy, sýretshilerdiń jumysyna, ónerine súısinip otyrmyn. Kıimdegi árbir element belgili bir mán-mańyzǵa ıe. Mysaly, mendegi beldik pen syrǵalar naqty sebeptermen iriktelip taǵyldy. Osyndaı kostıýmmen júrgen kezde jaýynger qyz bolý 30-40 paıyzǵa jeńildeı túsedi.

- Óziniń suhbattarynyń birinde rejısser Aqan Sataev kıno túsirilimine daıyndyq birneshe aı boıy júrgizilgenin sóz etti. Sizge qatysty daıyndyqtar qalaı júrdi?

- Bastapqyda, basqalarǵa sekildi men úshin de kastıngten kim ótkeni túsiniksizdeý boldy. Úsh-tórt aı osyndaı kelisilmegen kúıde boldy. Rólge naqty bekitkennen keıin ǵana tyńǵylyqty daıyndyqqa kiristim. Sol jerde eki aı boıy jattyǵý sharalarymen aınalystym. Alǵash ret salt atpen júrýdi úırendim. Sonymen qatar túrli trıýkterdi meńgerdim. Aıta keteıin, bizdi jattyqtyrýshylar aıamady. Barlyq is-qımyldar áskerdegideı boldy. Mende kınodaǵy tájirıbem bolmaǵandyqtan, akterlik sheberlikten sabaq aldym.

- Túsirilim úshin kóne túrki dıalektilerdiń biri jańǵyrtyldy. Sizge tildi meńgerý qıyn bolmady ma?

- Shynyn aıtqanda, tildi meńgerý qıyndaý boldy. Meniń oıymsha, ol sonshalyqty qazaq tiline uqsas emes. ıAǵnı ony ózim biletin tilderdiń eshbirimen salystyra almaımyn. Túsirilim kezinde til syndyrýǵa týra kelip otyr. Biraq ta basqa amal joq, úırenip jatyrmyn.

- Sońǵy saýal. Osy kartına buqaraǵa kórsetilgennen keıin, sizge basqa fılmderge túsý týraly usynystar kóp bolady degen oıdamyz. Osyǵan daıynsyz ba?  

- Usynystarǵa qaraı sheshim jasaıtyn bolamyn. Jańa jobalarǵa túsý týraly usynastar qazirdiń ózinde de bar. Eń bastysy, osy birinshi fılm boıynsha jumystardy laıyqty deńgeıde atqaryp shyǵý, óıtkeni bul týyndy men úshin aýqymdy joba. Keıinnen basqa jobalardy kóre jatarmyz.

- Áńgimeńizge rahmet!


Avtor: Maııa Teńizbaeva