«Tomırıs» fılmi Túrkııada prokatqa shyqty
Otandyq kınotýyndy Túrkııanyń 62 qalasynda 200-den astam kınoteatrlarynda kórsetiledi. Tarıhı fılmdi osy elde kórsetý quqyǵyn jergilikti Siyah Beyaz Movies kompanııasy satyp alǵan bolatyn.
Aıta ketsek, osy is-sharaǵa baılanysty Ystanbulda fılmniń tusaýkeseri ótti. Otandyq fılmdi Túrkııa kórermenderine rejısser Aqan Sataev pen basty róldi somdaǵan aktrısa Almıra Tursyn tanystyrdy. Sondaı-aq kórsetilimge Qazaqstannyń Túrkııa Respýblıkasyndaǵy Tótenshe jáne ókiletti elshisi Abzal Saparbekuly, Qazaqstannyń Ystanbuldaǵy Bas konsýly Álim Baıel, Túrkııanyń saıasatkerleri, shyǵarmashylyq zııaly qaýymy men qazaq dıaspora ókilderi qatysty.
- «Tomırıs» fılminiń Túrkııadaǵy prokatty karantın sharalaryna baılanysty birneshe ret keıinge qaldyrylǵan bolatyn. Biz úmit úzbeı kúttik. Endi mine, búginnen bastap bizdiń fılm Túrkııanyń kınoteatrlarynan kórsetiletin bolady, – dedi Aqan Sataev.
Eske salsaq, «Tomırıs» fılmi bizdiń zamanymyzǵa deıingi VI ǵasyrdaǵy Uly dalanyń aty ańyzǵa aınalǵan Tomırıs patshaıymynyń taǵdyry baıandalady. Fılm QR Mádenıet jáne sport mınıstrliginiń tapsyrysymen «Qazaqfılm» kınostýdııasynda Sataifilm kompanııasynyń qatysýymen túsirilgen.
Byltyr atalǵan kınotýyndy Parıjde ótken frantsııalyq L'Étrange Festival kınofestıvaliniń Gran-prıin jeńip aldy. Osyǵan oraı Frantsııadaǵy eń iri aqyly telearnalardyń biri Canal+ fılmdi kórsetý quqyǵyn satyp alyp, praım-taım ýaqytynda kórsetti. Sonymen qatar, Jaıdarbek Kúnǵojınov bastaǵan qazaqstandyq Nomad Stunts kaskaderler toby fılmde trıýkterdi qoıǵany úshin dúnıejúzilik Kaskaderler Akademııasynyń (AQSh) bedeldi Taurus syılyǵyn aldy.
Uly dala patshaıymy týraly fılmniń kórsetý quqyǵyn sondaı-aq Amerıka, Ulybrıtanııa, Italııa, Ispanııa, Japonııa, Taıaý Shyǵys, Ońtústik Koreıa, TMD, Sıngapýr, Rýmynııa jáne Frantsııanyń dıstrıbıýtorlary satyp alǵanyn aıta ketken jón.
