«Tomırıs» fılmi Eýropa men Azııanyń birneshe elinde kórsetiletin boldy
NUR-SULTAN. QazAqparat – «Tomırıs» fılmi Eýropanyń birneshe memleketinde kórsetiletin boldy. Bul týraly fılmniń rejısseri Aqan Sataev Instagram paraqshasynda jazdy, dep habarlaıdy QazAqparat tilshisi.
«Qurmetti dostar! Qýanyshty jańalyq. Kann onlaı̆n-kınonaryǵy aıasynda bizdiń Arclight Films satý-agentimiz «Tomırıs» kınotýyndysyn halyqaralyq kórsetilimge shyǵarý týraly sátti mámile jasaǵanyn habardar etti. «Tomırıs» fılmi: Frantsııa (dıstrıbıýtory: SND Films), Italııa (Blue Swan), Ispanııa (Art Mood), Reseı̆ (Paradise), Rýmynııa (Program 4 Media), Túrkııa (Siyah Bayez Movies), Japonııa (AT Entertainment), Taıaý Shyǵys (Gulf Film), Ońtústik Koreıa (Challan), Sıngapýr (Shaw) elderinde kórsetilimge shyǵady. Bul - bizdiń fılmimizdiń halyqaralyq tarıhynyń bastamasy ǵana dep senemiz» - dep jazdy Aqan Sataev óz paraqshasynda.
Eske sala keteıik, byltyr jaryqqa shyqqan kınotýyndy bizdiń zamanymyzǵa deıingi VI ǵasyrda bolǵan oqıǵany sýretteıdi. Fılmde kishkentaı qyzdan aıbyndy jaýyngerge aınalǵan, jaqyndarynan aırylyp, satqyndardan óshin alǵan jáne saq taıpalaryn biriktirgen uly dalanyń aty ańyzǵa aınalǵan Tomırıs patshaıymynyń taǵdyry baıandalady.
Fılm QR Mádenıet jáne sport mınıstrliginiń tapsyrysymen «Qazaqfılm» kınostýdııasynda Sataifilm kompanııasynyń qatysýymen túsirilgen.
Jyl basynda «Tomırıs» tarıhı dramasynyń AQSh aýmaǵyndaǵy dıstrıbýtsııa quqyǵyn Well Go USA kompanııasy satyp alǵan edi.
