Tomırıs Baısafanyń ólimine qatysty kúdikti qamaýǵa alyndy
MÁSKEÝ. QazAqparat – Qazaqstandyq stýdent Tomırıs Baısafanyń ólimine qatysty Daǵystan úkimetiniń burynǵy basshysy Mýhtar Medjıdovtyń uly Mýrtýzalı Medjıdov qamaýǵa alyndy, dep habarlaıdy QazAqparat tilshisi.
«Máskeý qalasynyń Basman aýdandyq sotynyń qaýlysymen aıyptalýshy Medjıdov Mýrtýzalı Mýhtarovıchke qatysty 2020 jyldyń 28 qyrkúıegine deıin qamaýǵa alý týraly bultartpaý sharasy qabyldandy», - dep habarlaıdy TASS agenttigi Basman sotynyń baspasóz qyzmetine silteme jasap.
«QazAqparat» HAA menshikti tilshisimen suhbat barysynda Tomırıs Baısafanyń sheshesi Janna Ahmetova osy iske qatysty jańa derekterden habardar bolǵanyn málim etti.
«Aıǵaqtar tabylypty. Ol ustaldy. Biraq istiń mán-jaıy maǵan áli belgisiz», - degen anasy M.Medjıdovtyń ustalǵany týraly aqparatty Máskeýde rastaǵanyn aıtty.
Janna Ahmetova tergeý barysymen baılanysta otyr. Karantın sharalary alynǵannan keıin Reseı astanasyna ushyp barmaq.
Eske sala ketsek, 2018 jyldyń sáýir aıynda qazaqstandyq stýdent qyz Tomırıs Baısafa Máskeý memlekettik halyqaralyq qatynastar ınstıtýtynyń terezesinen qulap ketken edi. Ol 3 mamyrda aýrýhanada qaıtys boldy. Qyzdyń ata-anasy onyń ózine qol salǵandyǵyna qatysty tergeýdiń nusqasymen kelispeı, tergeýdiń ádil júrgizilýin talap etken edi. Keıinnen QR Adam quqyqtary jónindegi ýákili (ombýdsmen) Asqar Shákirov Reseı Federatsııasynyń ombýdsmeni Tatıana Moskalkovaǵa Tomırıs Baısafanyń ólimin tergeýge kómek suraǵan bolatyn.