Tomırıs Baısafanyń ólimin tergeý nelikten sozylǵany belgili boldy
ASTANA. QazAqparat - Qazaqstannyń Reseıdegi Elshiligi Tomırıs Baısafanyń ólimin tergeý barysyn erekshe baqylaýda ustaýda. Bul týraly búgin QR Syrtqy ister mınıstrligi baspasóz qyzmetiniń jetekshisi Aıbek Smadııarov aıtty, dep habarlaıdy QazAqparat tilshisi.
«Qazaqstannyń Máskeýdegi Elshiligi janyndaǵy Konsýldyq bólim bul máseleni erekshe baqylaýynda ustap otyr. Qazirgi tańda tergeý jumystary júrgizilýde. Bizdiń aqparat boıynsha ókinishke oraı, tergeýshi aýysty. Sondyqtan sozylyp ketti. Alaıda, barlyq másele, jalpy qandaı da bir másele týyndaıtyn bolsa onda ony bizdiń konsýldyq bólim baqylaýyna alady», - dedi Aıbek Smadııarov.
Eske sala ketsek, bıylǵy sáýir aıynda qazaqstandyq stýdent qyz Tomırıs Baısafa Máskeý memlekettik halyqaralyq qatynastar ınstıtýtynyń terezesinen qulap ketti. Ol 3 mamyrda aýrýhanada qaıtys boldy. Qyzdyń ata-anasy onyń ózine qol salǵandyǵyna qatysty tergeýdiń nusqasymen kelispeıdi jáne tergeýdiń ádil júrgizilýin talap etýde.
Keıinnen QR Adam quqyqtary jónindegi ýákili (ombýdsmen) Asqar Shákirov Reseı Federatsııasynyń ombýdsmeni Tatıana Moskalkovaǵa Tomırıs Baısafanyń ólimin tergeýde kómek suraǵan bolatyn.
