Tómengi býyn ákimderin qyzmetten bosatý aýdandyq máslıhattyń kelisimimen júzege asýy kerek - Q.Óskenbaev

ASTANA. QazAqparat - Tómengi býyn ákimderin qyzmetten bosatý aýdandyq máslıhattyń kelisimimen júzege asýy kerek. Májilistegi «Nur Otan» partııasy fraktsııasy janyndaǵy Óńirlik saıasat jáne máslıhattarmen jumys jónindegi keńestiń otyrysynda Ulttyq ekonomıka vıtse-mınıstri Qaıyrbek Óskenbaev osylaı málim etti. Keńes jumysynda elimizdegi ózin-ózi basqarý tujyrymdamasyn damytý máseleleri talqylanǵan bolatyn.

Vıtse-mınıstrdiń sózine qaraǵanda, búgingi kúni aýdandyq mańyzǵa ıe qalalar, aýyldyq okrýg pen aýyl ákimderin taǵaıyndaý jáne laýazymynan bosatý máselesin qaıta qaraý qajettiligi týyndap otyr.

«Óıtkeni, QR Prezıdentiniń 2013 jylǵy 24 sáýirdegi Jarlyǵyna sáıkes, tómengi býyn ákimderi tıisti aýdandyq máslıhat depýtattarymen saılanady, al olardy laýazymynan bosatýdy aýdan ákimi oblys ákiminiń kelisimimen júzege asyrady. Bizdiń mınıstrlik jergilikti atqarýshy organdardyń usynystaryn saraptaı kele, ákimderdi jumystan bosatý tetiginiń ashyqtyǵyn arttyrý maqsatynda, tómengi býyn ákimderin qyzmetinen bosatýdy tıisti aýdan máslıhattarynyń mindetti kelisimimen júzege asyrý protsedýrasyn engizýdi durys dep sanaıdy», - dedi Q.Óskenbaev.

Aıta keterligi, bul rette vıtse-mınıstr tómengi býyn ákimderiniń saılaýynan keıingi bir jyl ishinde olardyń 30 paıyzy aýdan ákimderiniń sheshimimen máslıhattyń kelisiminsiz-aq jumysynan bosatylatynyn atap ótti.