Tómenge qaramańyz: Álemdegi eń uzyn shyny kópir ashyldy
ASTANA. QazAqparat - Qytaıdyń soltústigindegi Hebeı provıntsııasynda álemdegi eń uzyn aspaly shyny kópir qurylysy aıaqtaldy. Qurylysy bir jarym jylǵa sozylǵan kópir keshe, 24 jeltoqsanda resmı túrde ashyldy.
Bul týraly QazAqparat tilshisi China Daily gazetine silteme jasap habarlaıdy. 
Atalmysh basylymnyń jazýynsha, kúshti jelderge tótep bere alatyn kópir Shıtszıajýan qalasynyń mańyndaǵy Hýnıagý aýdanynda ornalasqan jáne eki tik jartastyń arasyn jalǵap tur. Onyń uzyndyǵy - 488 metr, eni - 2 metrdi qurasa, bıiktigi - 218 metrge (shamamen 66 qabat) jetedi. 
Sáýlettik nysannyń jalpy salmaǵy 70 tonnany quraıdy, ony salýǵa qalyńdyǵy 4 sm bolatyn 1077 móldir shyny paneli jumsalǵan.
Erekshe áser syılaý maqsatynda kópir kelýshiler sáýlettik nysannyń bel ortasynda jetkende qozǵalatyndaı etip jasalǵan. Erekshe nysan bir mezgilde 2 myń adamǵa deıin kótere alady, biraq ázirge 500 adamǵa ǵana bir mezgilde kópirge shyǵýǵa ruqsat berilgen.
