Tómen reıtıngti ákimder oryndarynan bosatylýda - QR Prezıdenti Ákimshiligi
ASTANA. 2 qazan. QazAqparat - Reıtıng nátıjeleri boıynsha, bıyl túrli deńgeıdegi 12 ákim laýazymdarynan bosatyldy.
Bul týraly búgin Astanada «Memlekettik organdar qyzmetiniń tıimdiligin baǵalaý» atty II halyqaralyq konferentsııa barysynda QR Prezıdenti Ákimshiligi Basshysynyń orynbasary Baýyrjan Baıbek málim etti.
«Árbir qazaqstandyq óziniń turǵylyqty jerine qaramastan, onyń ákimi nendeı sharýalardy tyndyrǵandyǵyn, qanshalyqty tıimdi jumys jasaıtyndyǵyn bilip otyrýy tıis. Reıtıng túrli 42 kórsetkish boıynsha belgili bir ákimniń jumysyna baǵa beredi. Osylaısha halyqtyń esep berý mádenıetin qalyptastyrýǵa úlken septigin tıgizdi. Reıtıng nátıjeleri boıynsha, bıyl túrli deńgeıdegi 12 ákim laýazymdarynan alyndy», - dedi B.Baıbek.
Onyń aıtýynsha, ákim saıası laýazymǵa taǵaıyndalǵannan keıin, eger bir jyl kóleminde tıisti kórsetkishterge, belgili bir nátıjelerge qol jetkize almasa, sondaı-aq onyń qaraýyndaǵy aýdan ózgelerden qalys qalyp jatsa, komıssııa onyń tómen kórsetkish kórsetýiniń sebebin talqylaıdy. Belgili bir menedjer qalanyń nemese aýdannyń damý dınamıkasyn qamtamasyz ete almaǵan bolsa, eki toqsannan keıin ol ornynan bosatylady.
Eske sala keteıik, ákimderdiń jumysyn baǵalaý reıtıngisi eki jyl buryn jasala bastady. Qazirgi ýaqytta ákimderdiń jumys sapasyn kórsetetin bul kórsetkishter BAQ betterinde jarııalanyp, halyqtyń keń talqylaýyna ıe bolyp otyr.
