Tómen kredıttik reıtınginde turǵan birqatar kompanııaǵa memlekettik qoldaý berilgen — Smaıylov
ASTANA. KAZINFORM — Jeńildetilgen qarjylandyrý sharttaryna sáıkes kelmeıtin jobalarǵa jıi qoldaý jasalǵan. Bul týraly kásipkerlik sýbektilerin memlekettik qoldaýdyń tıimdiligine júrgiziletin aýdıt boıynsha esepti jarııalaý kezinde Joǵary aýdıtorlyq palatanyń tóraǵasy Álıhan Smaıylov aıtty.
— «BAQYLAÝDA» aqparattyq servısiniń memlekettik qoldaý sharalary úshin tsıfrlyq platforma bolý perspektıvasy ekitalaı. Onyń mártebesi zańmen bekitilmegen. Keıbir operatorlar men memlekettik organdar oǵan derekterdi engizbeıdi. Ondaǵy derekterdiń anyqtyǵy men sapasy úshin eshkim jaýap bermeıdi. Servıste tekserilmegen ári 2023 jylǵa deıingi derekter ǵana bar. Eń bastysy, ony Qarjy mınıstrligi ákimshilendiredi, al Ulttyq ekonomıka mınıstrliginiń buǵan qatysy joq. Bir-birimen úılespeıtin memlekettik qoldaý júıesi saldarynan kóptegen operator paıda boldy. Máselen, qaryzdardy sýbsıdııalaý, eksporttyq qarjylandyrý, konsýltatsııa berý, shyǵyndardyń bir bóligin óteý operatorlary jáne basqalary bar. Operatorlardyń qyzmetine jumsalatyn shyǵystardy esepteý biryńǵaı emes. Ár operator óz qyzmetiniń qunyn óz qalaýynsha aıqyndaıdy, — dedi Álıhan Smaıylov Májilistiń jalpy otyrysynda.
Osy oraıda ol operatorlar kórsetken qyzmetterdiń sapasyna baǵalaý júrgizilmeıtinin aıtty. Bul rette vedomstvoaralyq úılestirý jetkiliksiz bolǵandyqtan, operatorlar óz erejelerin ornatqan. Keıbir operatorlar ótinimdi maquldaý kezinde kásipkerlerden zańnamada kózdelmegen qujattardy talap etedi. Basqa operatorlar memlekettik qoldaýǵa teń qol jetkizýdi jáne ony berýdiń ashyqtyǵyn qamtamasyz etpeıdi.
— «Atameken» kásipkerler palatasy «Men — kásipker» quraly boıynsha jekelegen sýbektilerge konsýltatsııa berýmen ǵana shekteledi. Keıbireýlerge qosymsha kórmeler, bıznes oqytý ótkizedi, bıznes-jospar ázirlep beredi. «Atameken» kásipkerler palatasy «Іskerlik baılanystar» jobasyna ótinimderdi qabyldaý resmı túrde bastalǵanǵa deıin ótinim berý týraly aldyn ala habardar bolǵan adamdardy jibergen. Sondaı-aq túrli shekti syıaqy mólsherlemesimen uqsas qoldaý sharalary qatar kórsetilgen. Tómen kredıttik reıtıngine qaramastan, birqatar kompanııaǵa memlekettik qoldaý berilgen. Al kópshilik úshin bul shekteý saqtalǵan. Jeńildetilgen qarjylandyrý sharttaryna sáıkes kelmeıtin jobalar da jıi qoldaý alyp otyrǵan. Munyń barlyǵy jalpy kásipkerler úshin qoldaý sharalarynyń qoljetimdi bolýyn qıyndatady, — dedi JAP basshysy.
Aıta keteıik, jaqynda Úkimet otyrysynda shaǵyn jáne mıkro bıznesti naqty qoldaýǵa, óńirlerdiń ereksheligin eskere otyryp, óndiristi damytýǵa baǵyttalǵan keshendi baǵdarlama tanystyryldy.