Tomasov «Astana» komandasynyń 600-shi golynyń avtory atandy
ASTANA. QazAqparat - Eýropa Lıgasy 1/16 fınaly aıasynda ótken «Astana» - «Sportıng» kezdesýinde «Astana» komandasy resmı kezdesýlerdegi 600-shi golyn soqty, dep habarlaıdy QazAqparat klýbtyń saıtyna silteme jasaı otyryp.
600-shi goldyń avtory komandanyń jartylaı qorǵaýshysy Marın Tomasov. Horvatııalyq oıynshy komandalas áriptesi Igor Shıtovtyń tamasha pasyn sátti paıdalanyp, Rýı Patrısıo qaqpasynan sańylaý tapqan bolatyn.
«Eýropa Lıgasy 1/16 fınaly aıasynda ótken «Astana» - «Sportıng» arasyndaǵy kezdesý el fýtboly tarıhyndaǵy eń eleýli oqıǵalardyń biri boldy. Sebebi, osyǵan deıin birde-bir qazaqstandyq komanda eýrokýbokterde dál mundaı nátıjege qol jetkizbegen»,- delingen habarlamada.
Eske sala keteıik, astanalyqtar ótken maýsymda 500-shi goldaryn soqqan edi. Pavlodarlyq «Ertiske» qarsy kezdesýdegi goldyń avtory -Serikjan Mýjıkov.
