Tomas Bahtyń ornyna HOK basshysy laýazymyna kimder úmitker bola alady
ASTANA. KAZINFORM – Aldaǵy ýaqytta Halyqaralyq Olımpıada komıtetiniń (HOK) jańa prezıdenti saılanady. Óz kezeginde Komıtettiń qazirgi basshysy Tomas Bah osy qyzmetten ketetinin rastady.
Bul turǵyda HOK basshysy laýazymyna kim kelýi múmkin ekenin jáne osy jaıynda sarapshylar ne aıtyp jatqanyn kópshilik nazaryna usynýdy jón kórdik.
Ázirge, Tomas Bahtyń ornyn basatyn bir ǵana úmitker belgili, ıaǵnı Halyqaralyq jeńil atletıka federatsııalary qaýymdastyǵynyń basshysy Sebastıan Koýdyń esimi atalyp júr. Ol 2025 jylǵy naýryzda ótetin saılaýǵa qatysý múmkindigin qarastyryp jatqanyn ashyq aıtty. Bul týraly Sport.kz jazady. https://www.sports. /news/stal-izvesten-pervyiy-pretendent-na-post-prezidenta-mok-posle-uhoda-tomasa-baha
Parıj Olımpıadasy jabylar aldynda jýrnalıster Sebastıan Koýdan naýryzdaǵy saılaýǵa qatysý múmkindigi týraly surady. Óz kezeginde ol «eger atalǵan laýazymǵa saılanýǵa tıisti múmkindik bolsa, ony mindetti túrde qarastyratynyn» atap ótti. Al BBC jáne The Guardian sııaqty brıtandyq BAQ onyń málimdemesin HOK tóraǵalyǵyna básekege túsýge daıyn ekendiginiń «aıqyn belgisi» dep jarııalap jatyr.
Atap aıtqanda, Sebastıan Koý buǵan deıin osyndaı málimdemelerin jasap júrgen edi. Buǵan qosa, bıylǵy Olımpıada kezinde de ol aljırlik jáne taıvandyq sportshylar Iman Helıf pen Lın ıÝtıngtiń boks týrnırine qatysý máselesin sheshýge qatysty HOK-tyń kózqarasyna kóńili tolmaıtynyn ashyq aıtty. Bul sportshylardy Halyqaralyq boks qaýymdastyǵy (IBA) genderlik testiler negizinde jarystardan shettetken edi. Ekeýi de Parıjde altyn medal jeńip aldy. Koýdyń paıymynsha, olarǵa qatysty HOK-tyń saıasaty «naqty ári túsinikti» bolýy tıis.
Sebastıan Koý HOK basshysy laýazymyna daýys berý naýqany týraly aıta kele, 2025 jylǵy saılaýda básekelestik óte joǵary bolatynyn sóz etti.
Sarapshylardyń jazýynsha, Tomas Bahtyń ornyn basatyn úmitkerlerdiń qataryna HOK vıtse-prezıdentteri Nıkol Hýverts pen Hýan Antonıo kishi Samaranchty, sondaı-aq uıymnyń Sportshylar komıssııasyn basqaryp júrgen Kırstı Koventrı enip otyr.
Aıta keteıik, Nıkol Hýverts (Arýba) sınhrondy júzý sportshysy retinde tanymal. Nıkol 2006 jyldan beri Halyqaralyq Olımpıada komıtetiniń múshesi jáne qazir HOK Atqarýshy komıtetiniń múshesi. 2021 jyldyń shildesinde ol HOK vıtse-prezıdenti retinde saılandy.
Hýan Antonıo kishi Samaranch (1959 jyly 1 qarashada týǵan) — ıspandyq sport qaıratkeri jáne halyqaralyq Olımpıada qozǵalysynyń qaıratkeri. Ol 2001 jyldan beri Halyqaralyq Olımpıada komıtetiniń múshesi.
HOK basshysy laýazymyna úmitker Kırstı Lı Koventrı Sıýard - zımbabvelik júzýshi ári saıasatker, halyqaralyq olımpıadalyq qozǵalystyń qaıratkeri, eki dúrkin Olımpıada chempıony, birneshe ret álemdik rekord ornatqan.
Frantsýzdyq L'Equipe basylymynyń jazýynsha, atalǵan saılaýǵa Frantsııanyń Ulttyq Olımpıada komıteti men Halyqaralyq velosıpedshiler odaǵynyń (UCI) prezıdenti Davıd Lapartıan da qatysýy múmkin.
Davıd Lapartıan 1973 jyly dúnıege kelgen. 2005 jyly ol Halyqaralyq velosıpedshiler odaǵynyń (UCI) basqarý komıtetine saılandy. 2009 jyly aqpanda Frantsııa velosport federatsııasynyń prezıdenti boldy, al 2013 jyly 23 aqpanda osy laýazymǵa qaıta saılandy. 2013 jyldyń naýryzynda ol Eýropa velosport odaǵynyń prezıdenti retinde bekitilse, sol jyldyń 28 qyrkúıeginde Halyqaralyq velosıpedshiler odaǵynyń vıtse-prezıdenti boldy. 2021 jyly ol jańa tórt jyldyq merzimge UCI prezıdenti bolyp saılanady.
Eske salaıyq, Tomas Bah Halyqaralyq Olımpıada komıtetin 2013 jyldyń kúzinen beri basqaryp keledi. 2021 jyly ol tórt jyldyq merzimge qaıta bekitildi, ıaǵnı Olımpıada hartııasynyń erejelerine sáıkes osy laýazymǵa sońǵy ret saılandy. T. Bahtyń ózi HOK Atqarýshy komıtetinen uıym basshysyn saılaýdy 2025 jyldyń 26 naýryzyna belgileýdi suraǵan. Jańa prezıdent qyzmetine kelesi jyldyń 24 maýsymynda kirisedi.
