Tomas Bah HOK basshysy ókilettigin resmı túrde Kırstı Koventrıge tapsyrdy

ASTANA. KAZINFORM — Lozannadaǵy Olımpıada úıinde Halyqaralyq olımpıada komıteti prezıdentiniń ókilettikterin tapsyrý rásimi ótti, dep habarlaıdy QR Ulttyq Olımpıada komıteti.

HOK-ty 2013 jyldan beri basqaryp kelgen Tomas Bah bul qyzmetti júzýden eki dúrkin Olımpıada chempıony, zımbabvelik Kırstı Koventrıge tapsyrdy.

Koventrı HOK-tyń 10-shy prezıdenti boldy jáne bul laýazymdy atqarǵan alǵashqy áıel jáne Afrıka qurlyǵynan alǵashqy ókil retinde tarıhqa endi. Ol osy jyldyń naýryz aıynda Olımpııada (Grekııa) ótken HOK 144-shi sessııasynda segiz jyldyq merzimge saılandy.

Rásim barysynda Bah Olımpıada úıiniń kiltin sımvoldyq túrde Koventrıge tabys etti, bul — basshylyq aýysýynyń dástúrli aktisi. Kiltti Barselonada 1992 jylǵy Olımpıada alaýynyń avtory, ıspandyq dızaıner Andre Rıkar jasaǵan. Zalǵa HOK músheleri, sportshylar, qoǵam qaıratkerleri jáne halyqaralyq seriktesterdi qosqanda 700-den astam qonaq jınaldy.

Semserlesýden Olımpıada chempıony jáne HOK toǵyzynshy prezıdenti Tomas Bah uıymnyń eń joǵary nagradasy — altynnan jasalǵan Olımpıada ordenimen marapattaldy. Qoshtasý sózinde ol áriptesterine rızashylyǵyn bildirip, onyń ketýi — jańarý jolyndaǵy sanaly qadam ekenin atap ótti.

— Jańa ýaqyt jańa kóshbasshylyqty qajet etedi. Kırstı Koventrı — ómiri olımpıadalyq qundylyqtarmen tyǵyz baılanysty adam. Ol qozǵalystyń bolashaǵy úshin óte mańyzdy jańa daýys pen tyń kózqaras ákelip otyr, — dep atap ótti Tomas Bah.

Koventrı Bahqa 12 jyldyq jumysy, olımpıadalyq qaýymdastyqtyń birligi men oǵan qoldaý tanytqany úshin alǵys aıtty.

— Siz bizge «birge» ıdeıasyna negizdelgen mura qaldyrdyńyz. Biz bul murany maqtan ete alamyz dep úmittenemin, tipti eń qıyn ýaqytta da qundylyqtaryńyzǵa adaldyq tanytqanyńyz úshin rahmet, — dedi ol.

Koventrı sondaı-aq birlesken jumysqa shaqyrdy.

— Bizdiń ekojúıe órmek sııaqty kúrdeli, biraq biz birtutas bolsaq kúshti. Árkim mańyzdy ról atqarady. Tek birigip qana bolashaq urpaqty shabyttandyryp, armandardyń shyndyqqa aınalýyna kómektese alamyz, — dep atap ótti Koventrı.

Buǵan deıin habarlanǵandaı, «Barys» hokkeı komandasynyń bas dırektory taǵaıyndaldy.