Tom Leffler Golovkınmen jumysyn toqtatatyny týraly aqparatqa jaýap berdi
Aldymen Leffler ESPN jýrnalısi, buǵan deıin óziniń Golovkınmen joldary aıyrylysatynyn habarlaǵan Den Rafaelge qarata jazdy.
«Den, GGG búgin maǵan munyń sary baspasóz ekenin aıtty. Sondaı-aq olarǵa ózi nemese mansaby týraly bizdiń aıtqan sózimizdi dáıek ete eshteńe aıtýdyń qajeti joqtyǵyn jetkizdi. Muny jazý netken jaýapsyzdyq edi. Endi jurt seniń sózińdi paıdalanyp, jalǵan aqparattyń negizinde tutas maqalalar jazý úshin qoldanýda», - dep jazdy Leffler.
Artynsha Leffler osynyń aldynda Golovkınniń otbasynda ul bala dúnıege keletini týraly aıtqan Maık Koppındjerge (The Ring/Fox Sports) ózgelerdi qurmetteı bilý qajettigin uqtyrdy:
«Maık, Golovkınniń mansaby týraly qańqý sóz taratýdy doǵar da, jańalyqtardy kút. Áleýmettik jelide GGG-diń jeke ómiri týraly jazba, ol otbasyna da, boksqa da úlgerip júr. Oǵan azdaǵan qurmet bildirip, biz resmı málimdeme jasaǵansha kúte tur», - dedi ol.
Ol sondaı-aq jýrnalıst Mark Orteganyń (PBC on Fox) da sybaǵasyn berdi:
«Mark, sen de basqa «medıa» syndy jalǵan aqparat taratyp jatyrsyń. «Maımyl kórgenin isteıdi». Bir nárse jazar aldynda faktilerdi tekserip al nemese maǵan qońyraý soq. Óz promoýterimen kelisimshartty buzýǵa talpynǵan Ýord úsh ret jeńilis tapty. TGB Promotions osyny qýana seniń esińe salady», - dep jazdy Leffler.
