Tolyqtaı alǵanda qazirgi ýaqytta óńirdegi jaǵdaı turaqtaldy - Q.Qasymov
ASTANA. 20 jeltoqsan. QazAqparat /Marlan Jıembaı/ - Mańǵystaý oblysyndaǵy tártipsizdikterge baılanysty 8 adam tutqyndalyp, 19 adam kúdikti dep ustaldy jáne 41 adam ákimshilik jaýapkershilikke tartyldy.
Bul týraly búgin Úkimet otyrysynda Aqtaýdan tikeleı beınebaılanysqa shyqqan QR Іshki ister mınıstri Qalmuhambet Qasymov málim etti.
«Jedel tergeý toby kúsheıtilip, tolyq kólemde jumys isteýde. Búgingi tańda 8 adam tutqyndaldy. Sonymen qatar 19 adam kúdikti dep ustaldy. Biz olardyń qylmysqa qatysy bar dep esepteımiz. Tekserý amaldary júrgizilýde. Qazirgi ýaqytta ákimshilik jaýapkershilikke 41 adam tartyldy», dedi mınıstr. Onyń atap ótýinshe, Jańaózen qalasy men Shetpe stansasynyndaǵy tártipsizdikter barysynda 110 adam jaralanyp, aýrýhanaǵa jetkizilgen. Olardyń 73-i ambýlatorlyq em qabyldaýda. 15 adam, onyń 14-i Jańaózende, bireýi Shetpede qaza tapty.
«Jańaózen qalasynda 9, al Shetpede 8, jalpy 17 polıtsııa qyzmetkeri jaraqat aldy. Onyń altaýy emdelip jatyr. Tolyqtaı alǵanda qazirgi ýaqytta óńirdegi jaǵdaı turaqtaldy. Qalada sholǵynshylyq qyzmet jolǵa qoıylǵan», dedi Q.Qasymov.
