«Tolqysyn shartarap» án baıqaýynyń jeńimpazdary anyqtaldy
TÚRKІSTAN. QazAqparat – Túrkistan oblysynda vals koroli Shámshi Qaldaıaqovtyń 90 jyldyǵyna oraı uıymdastyrylǵan «Tolqysyn shartarap» atty respýblıkalyq án baıqaýynyń jeńimpazdary anyqtaldy. Oblystyq «Jastar resýrstyq ortalyǵy» uıymdastyrǵan óner saıysyna elimizdiń ár óńirinen 40-qa jýyq úmitker qatysty, dep habarlaıdy QazAqparat tilshisi.
Baıqaý jeńimpazdaryn marapattaý rásimi Qazaqstan Resrýblıkasynyń Halyq ártisi Sh.Qaldaıaqovtyń týǵan ólkesinde ótti. Saltanatty sharaǵa ortalyq basshysy men arnaıy qonaqtar qatysty.
Jastar resýrstyq ortalyǵynyń basshysy Amalbek Ómirtaı kompozıtordyń shyǵarmashylyǵyna toqtalyp, aldaǵy ýaqytta da sazger murasy nasıhattala beretinin atap ótti.
«Bul óner saıysynyń ózge jarystardan ereksheligi onlaın rejımde ótkizilgeninde. Karantınge baılanysty baıqaýdy osyndaı jolmen ótkizýdi jón sanadyq. Mundaǵy maqsat - jastardyń bos ýaqytyn tıimdi paıdalanyp, sazger Shámshi atamyzdyń mol murasyn el ishinde nasıhattaý bolatyn. Maqsat oryndaldy degen senimdemin. Ulylarymyzdy ulyqtaýǵa arnalǵan sharalar munymen shektelmeıdi», – deıdi A.Ómirtaı.
Baıqaýdyń birinshi kezeńinde belgili sazgerler men sahna tili mamandary úzdik 10 qatysýshyny iriktese, ekinshi aınalymda júldeger úshtikti kórermender daýys berý arqyly anyqtaldy. Mádenı saıystyń qortyndysymen І oryndy Aıaýlym Qoıshybaı alsa, ІІ oryn «Qos-Tura» dýetine buıyrdy. Al, Aıdos Álqýat ІІІ oryndy qanaǵat tutty.
Baıqaý jeńimpazdaryna arnaıy alǵys tabystalyp, qarjylaı syı-sııapat jasaldy. Aıta keteıik, shara aıasynda sazgerdiń qurmetine ashylǵan «Shámshi úıine» onlaın saıahat jasaldy.
Jaqynda ǵana ashylǵan «Shámshi úıine» kompozıtor men otbasyna tıesili júzden asa dúnıe qoıylǵan.
