Tólqujatty tegin alatyn azamattardyń 9 sanaty
ASTANA. KAZINFORM – Shetelge shyqqysy keletin keı qazaqstandyqtar memlekettik tólqujatty tegin ala alady. Máselen, byltyr 102 myń azamat pasport alý úshin tólenetin baj salyǵynan bosatylǵan.
ІІM Kóshi-qon qyzmeti komıteti Halyqty qujattandyrý basqarmasynyń aǵa ınspektory Aınur Baıgelenovanyń aıtýynsha, memlekettik qujatty alý úshin baj salyǵyn tólemeıtin azamattardyń sanaty bar.
Salyq kodeksiniń 622-babyna sáıkes:
- UOS ardagerleri men olarǵa teńestirilgen tulǵalar
- Keńes odaǵynyń batyrlary
- Sotsıalıstik eńbek erleri
- Múgedektigi bar azamattar (barlyq top)
- Bala kezinen múgedek bolǵan azamattyń ata-anasynyń biri
- Qarttar men múgedekterge arnalǵan mekemelerde turatyn egde jastaǵy adamdar
- Jetim balalar jáne balalar úılerinde nemese ınternattarda turatyn ata-anasynyń qamqorlyǵynsyz qalǵan balalar
- «Batyr Ana», «Altyn alqa» jáne «Kúmis alqa» tósbelgileriniń ıeleri
- Chernobyl apatynyń saldarynan zardap shekken azamattarǵa tólqujat tegin beriledi.
– Іshki ister mınıstrliginiń 2020 jylǵy 30 naýryzda bekitilgen 267 buıryǵy bar. Sonda tolyǵymen jazylǵan. Múgedektigi bar bala bolsa, ol ózi turatyn óńirdegi Halyqqa qyzmet kórsetý ortalyǵyna barady. Tıisinshe balanyń týý týraly kýáligin ata-analarynyń bireýi kórsete otyryp, aryz jazady. Al Chernobyl apatynan zardap shekken, UOS qatysqan azamattar arnaıy kýálikterin kórsetip, tegin ala alady, - dedi Aınur Baıgelenova Kazinform agenttigine bergen suhbatynda.
Demek, kez kelgen qazaqstandyq óziniń belgili bir sanatqa jatatynyn qujat júzinde dáleldese jetkilikti. Tólqujat ótinish qabyldanǵannan keıin 15 jumys kúni ishinde daıyn bolady. Alaıda mundaı azamattar qujatty jedel alǵysy kelse, aqy tóleýi kerek.
– Biraq jedeldetilgen pasportqa baj salyǵy salynady, ıaǵnı ol shamamen 1,5-3 myń teńgeniń aralyǵynda bolady. Sonymen qatar jedeldetilgen tólqujat Astana, Almaty, Shymkent, Aqtóbe qalalarynda 1-3 kúnde daıyn bolsa, basqa respýblıkalyq mańyzy bar qalalarda 3-5 kún alady. Ol poshtanyń jetkizý merzimine baılanysty, - deıdi Komıtet ókili.
Ózge qazaqstandyqtar memlekettik tólqujatty alý úshin belgilengen baj salyǵyn tóleýi kerek. Al bıyl pasporttyń quny qalaı ózgergenin myna silteme arqyly bile alasyzdar.