Tolqyn Zabırova kelinine qandaı talaptar qoıady

ASTANA.KAZINFORM — Estrada jáne opera ánshisi, Qazaqstannyń eńbek sińirgen qaıratkeri Tolqyn Zabırova – úsh uldyń anasy. Ol bolashaq kelinine qandaı talaptar qoıady?

Bul týraly ánshi «Búgin LIVE» baǵdarlamasyna bergen suhbatynda aıtty.

— Tórt qubylam teń. Úıde joldasym, úsh ulym bar. Úlkenim 23 jasta, Shahrııar. Sıngapýr ýnıversıtetin bitirip, dıplomyn alyp, qazir óziniń shaǵyn kásibimen aınalysyp jatyr. Ekinshim Dıar — óner jolyn qýyp kele jatqan izbasarym. Qurmanǵazy atyndaǵy konservatorııada bıyl 4-kýrsta oqıdy. Kenjetaıymyz Sanjar — JOO-nyń 3-kýrsynda oqıdy. Balalar jaqsy jetistikterin kórsetip jatyr, — dedi ánshi.

Tolqyn Zabırova, sondaı-aq, bolashaq kelinine qandaı talaptar qoıatynyn da aıtyp ótti.

— Qandaı kelin kerek maǵan? Ol qandaı bolý kerek? Ata-ananyń tilegi: bir-biriniń tilin tapsa, syılastyqpen ómir cúrse, odan artyq maǵan eshnárse kerek emes. Eshqandaı talap qoımaımyn. Ulymnyń tańdaýyn qabyldaımyn. Ana esh ýaqytta keri júrmeýi kerek, ár adamnyń óziniń sezimi bar. Ár adam júregin tyńdaýy tıis. Táýligine 24 saǵat áńgime aıtsaq ta, men ony túbine deıin túsinbeıtin shyǵarmyn. Ol basqa otbasynda tárbıe alǵan adam. Meniń balam qabyldady ma, men úshin ol tabý, talqylanbaıdy, — dedi Tolqyn Zabırova.

Ánshi jýyrda Astana jáne Almatyda shyǵarmashylyq keshin beredi. «Ómirge ǵashyqpyn» kontserti 17 qazanda Almatyda jáne 23 qazan kúni Astanada ótedi.

Aıta keteıik, Tolqyn Zabırova — qazaq estradasyna operalyq mýzykany ákelgen tuńǵysh ánshiniń biri. Qazaqstannyń eńbek sińirgen qaıratkeri. Ónertaný ǵylymdarynyń kandıdaty. Qazaq ulttyq óner akademııasynyń professory.