Mańǵystaý oblysynda gaz uńǵymasyndaǵy apat joıyldy

ASTANA. KAZINFORM — Oqıǵa ornynda jedel shtab qurylyp, onda apatty joıý boıynsha jumys jospary jasaldy, dep habarlaıdy TJM baspasóz qyzmeti.

Apatty jaǵdaıdy joıý úshin oqıǵa ornyna TJD kúshteri men quraldary jáne «Aqberen», «Ońtústik munaı servıs», Nobilis Corp jáne Varro Operating Group kompanııalarynyń mamandary tartyldy.

— Oqıǵa ornynda jedel shtab qurylyp, onda apatty joıý boıynsha jumys jospary jasaldy. Aýany gaz analıtıkalyq apparatýramen ólsheı otyryp, uńǵyma saǵasynyń jaı-kúıi zertteldi. Kelgen qyzmetkerler men mamandar qubyr keńistigi arqyly uńǵymany jabý jumystaryn júrgizdi. Krest preventoryn bólshektep, aǵyp ketýdi boldyrmaý jáne tyǵyzdaýdy qamtamasyz etý úshin uńǵymanyń kireberisine jańa qorǵanys elementin ornatty. Sondaı-aq uńǵymadan 60 m qashyqtyqta órt shyqqan jaǵdaıda sý jınaý úshin transheıany qazý jumystary júrgizildi, — delingen habarlamada.

Vedomstvo atap ótkendeı, zardap shekkender joq. Apattyń sebebi anyqtalyp jatyr. 

Eske salsaq, 6 maýsymda Mańǵystaý oblysy Beıneý aýdanyndaǵy «Tolqyn» ken ornynda №57 uńǵymada qubyr keńistigi arqyly gaz ben sýdan turatyn qospa syrtqa shyqty. Janý faktisi tirkelmedi.