Tóleýtaı Raqymbekov jeke qosalqy sharýashylyq týraly zań jobasyna pikir bildirdi
Aıta keteıik, atalǵan qujat «Ashyq NQA» portalynda ornalastyrylǵan edi.
«Zańnama boıynsha kez kelgen normatıvtik-quqyqtyq aktilerdiń jobasy qoǵamdyq talqylaý úshin zań jobasyn daıarlaýshy memlekettik organdardyń portaldarynda ornalastyrýy tıis. Osy oraıda «Jeke qosalqy sharýashylyq týraly» zań jobasy da osyndaı rásimnen ótti. Tıisti ýaqytta qujatqa qatysty 1 500-ge jýyq jaýap kelip tústi. Sonyń arasynda 900-i pozıtıvti bolsa, 600-i teris pikirde jazylǵan. Ár osyndaı teris pikirge jaýap berip otyrdyq. Atap aıtqanda, bir pikirdi qaıta-qaıta bir adamdar qaldyra bergen. Máselen, bir adam 40 márte atalǵan zań jobasyna qarsy ekenin jazǵan. Osy teris pikirdiń birazyn qaldarǵandardyń arasynda fıtnes klýbtyń bapkeri, sán salonynyń bet árleýshisi, kólik jóndeý ornynyń qyzmetkeri bolyp shyqty. Osy adamdar zań jobasyna qarsy ekenin bildirgen. Eger dáıekti mysaldardy keltirip, salmaqty pikir jazsa, túsiner edik. Al jaı ǵana «zań jobasyna qarsymyn» dep qysqa qaıyrǵanynda eshbir ýáj joq», - dedi T. Raqymbekov Aýyl sharýashylyǵy mınıstrliginde ótken brıfıngide.
Onyń aıtýynsha, osyndaı zańnamany qabyldaý týraly alǵashqy ıdeıa 2003 jyldyń jazynda paıda boldy.
«Zań jobasy 2003 jyly Aýyl sharýashylyǵy mınıstrliginde ázirlendi, alaıda 2004 jyldyń qańtarynda zań jobalary boıynsha vedomstvoaralyq komıssııasynyń otyrysynda oǵan qarsylyq tanytqandar paıda boldy. Olar sol kezde bul zań jobasyn «azamattardyń jeke menshigindegi mal basyn shekteýge áreket jasalyp jatyr» dep túsingen edi. Oǵan qaramastan, qujat Parlamentke engizilgen bolatyn, alaıda úsh jylǵa jalǵasqan talqylaýdan keıin 2007 jyly mınıstrlikke qaıtaryldy. Sonymen qatar, 2017 jyly jeke qosalqy sharýashylyq týraly zań jobasyn daıarlaý bastamasyna mınıstrlik qaıta oraldy. Biraq 2017 jyldyń sońynda mınıstr aýysyp, agrarlyq saıasat ta túbegeıli ózgerdi. Basymdyq retinde iri agorobıznes nazarǵa alyndy. Endi úshinshi ret bastama retinde kóterilgen qadamdar sátti bolady degen oıdamyn. Kóptegen elderdegideı jeke qosalqy sharýashylyq týraly zańy paıda bolatyn ýaqyt jetti. Bul turǵyda Memleket basshysy Qasym-Jomart Toqaevtyń tıisti tapsyrmasy bar», - dedi Tóleýtaı Raqymbekov.
«Bizdiń Konstıtýtsııamyz jekemenshikti qorǵaýǵa kepildik berip otyr. Sondyqtan jeke qosalqy sharýashylyq týraly zań jobasynyń maqsaty jeke menshiktegi mal basyn shekteýdi kózdemeıdi. Qujattyń tutas mátininde azamattardyń jeke menshigindegi mal basyn shekteýge qatysty birde-bir sózdi tappaısyzdar», - dedi mınıstrdiń keńesshisi.
Budan buryn habarlanǵandaı, Qazaqstanda jeke qosalqy jáne usaq sharýa qojalyqtarynyń jıyntyq úlesine azyq-túlik taýarlaryn óndirýdiń basym úlesi tıesili - shamamen 70-80%.
Mysaly, olar barlyq túrdegi súttiń 90% - yn, ashyq jerdegi kókónisterdiń 84% - yn, kartoptyń 83% - yn jáne soıý salmaǵyndaǵy barlyq túrdegi ettiń 70% - yn óndiredi. Jalpy, jeke qosalqy sharýashylyqtyń úlesine búkil aýyl sharýashylyǵynyń jalpy óniminiń jartysyna jýyǵy tıesili. Sonymen qatar, uıymdasqan agroqurylymdardan, sol sharýa qojalyqtarynan nemese zańdy tulǵalardan aıyrmashylyǵy, jeke sharýa qojalyqtary muny eshqandaı memlekettik qoldaýsyz jasaıdy.
