Tóleýtaı Raqymbekov Shyǵys Qazaqstandaǵy sút fermasyna bardy

ÓSKEMEN. QazAqparat - «Aýyl» partııasynan prezıdenttikke úmitker Tóleýtaı Raqymbekov Shyǵys Qazaqstan oblysyn aralap júr, dep habarlaıdy QazAqparat kandıdattyń áleýmettik jelidegi paraqshasyna silteme jasap.

Prezıdenttikke úmitkerdiń aıtýynsha, bul sapardyń maqsaty - óńirdiń aýylsharýashylyq salasyndaǵy máselelermen jaqyn tanysyp, turǵyndarynyń saýaldaryna jaýap berý. Búgin saılaýaldy top ShQO-daǵy sút-taýarly fermaǵa bardy. Fermada 3 000 bas mal bar, onyń shamamen jartysy - saýyn sıyr.

«Jylyna orta eseppen alǵanda bir sıyrdan saýylǵan sút 8 myń kg asady. Bul - Qazaqstandaǵy ortasha kórsetkishten 3 ese kóp. Eger el kóleminde muny 3 esege arttyrsa, búgingi kúni 6 mln tonnaǵa qosymsha 12 mln tonna ónim shyǵaryp, daıyn ónimdi eksportqa jiberer edik», - dep jazady Tóleýtaı Raqymbekov.

Shyǵysqazaqstandyqtar mundaı jetistikke qalaı qol jetkizdi? «Aýyldyq» kandıdattyń pikirinshe, onyń úsh sebebi bar.

«Birinshiden, óndiristi durys uıymdastyrý men durys menedjment arqasynda. Ekinshiden, qazirgi zamanǵy tehnologııalarǵa ınvestıtsııa salý, úshinshiden, óndiristiń, ǵylym men bilimniń tyǵyz ıntegratsııasy. Fermadaǵy ortasha jalaqy osy saladaǵy ortasha kórsetkishten 3 ese kóp», - deıdi maman.