Tóleýtaı Raqymbekov shtabynyń basshysy Tarazda stýdenttermen kezdesti

TARAZ. QazAqparat - «Aýyl» partııasynan atynan Prezıdenttikke kandıdat Tóleýtaı Raqymbekovtyń respýblıkalyq qoǵamdyq shtabynyń basshysy Álı Bektaev Tarazdaǵy ınnovatsııalyq-gýmanıtarlyq ýnıversıtette bolyp, úmitkerdiń saılaýaldy baǵdarlamasyn tanystyrdy, dep habarlaıdy QazAqparat partııanyń baspasóz qyzmetine silteme jasap.

Atalmysh JOO aýyl sharýashylyǵy salasyna qajetti mamandardy daıarlaıdy jáne osy baǵyttaǵy ǵylymı jumystardy atqarady. Al, «Aýyl» parııasynyń úmitkeri eń aldymen osyndaı bilim ordalaryna qoldaýdy kúsheıtý kerektigin negizge alǵan.

«Bizdiń kandıdattyń saılaýaldy baǵdarlamasyndaǵy eń negizgi másele de osy. Ǵylym men óndiristiń, odan keıin bilim, oqý júıesi men óndiristiń tikeleı baılanysta bolýyn qadaǵalaıdy. Jastardy tek qana teorııamen sýsyndata almaımyz. Alǵan bilim ary qaraı óndiriske enýi kerek. Óndiris damýy kerek», - dedi Álı Bektaev.

Ýnıversıtet qabyrǵasynda ótken jıynǵa tek bilim ordasynyń stýdentteri men qyzmetkerleri ǵana qatysqan joq. Jambyl oblysynyń túkpir-túkpirinen, ásirese, shalǵaı aýyldardan sala mamandary keldi. Kókeıde júrgen suraqtaryn qoıdy. Baǵdarlamanyń aýyl turǵyndarynyń turmysyna, sharýashylyǵyna jáne áleýmettik máselelerine qatysty tetikterimen tanysty.

Aıta ketý kerek, Tóleýtaı Raqymbekovtyń baǵdarlamasy tek aýyl sharýashylyǵyn damytýmen ǵana baılanysty emes. 4 bólimnen turatyn tuǵyrnamada ulttyq dástúrlerdi jańǵyrtý, otbasylyq qundylyqtardy saqtaý jáne jastar saıasatyn júıeleý sııaqty baǵyttar da qamtylǵan.