Tóleýtaı Raqymbekov Batys Qazaqstandaǵy sharýa qojalyqtaryn aralady

NUR-SULTAN. QazAqparat - «Aýyl» partııasy atynan Prezıdenttikke úmitker Tóleýtaı Raqymbekov Batys Qazaqstan oblysynyń sharýa qojalyqtaryn aralady, dep habarlaıdy partııanyń baspasóz qyzmeti.

Kandıdat aýyl sharýashylyǵy salasynda eńbek etip júrgen mamandarmen kezdesip, saılaýaldy baǵdarlamasyn tanystyrdy. Saladaǵy ózekti máselelerdi kóterdi.

Terekti aýdanyna qarasty «Ahas» sharýa qojalyǵynda 1400-den asa aqbas sıyr bar. Bul - jergilikti klımatqa ábden beıimdelgen etti baǵyttaǵy tuqym. ıAǵnı, bundaǵy iri qaralardyń ortasha salmaǵy 550 keli tartady. Eshqandaı hımııa qoldanylmaıdy. Jaıylymda júrip salmaq jınaıdy. Prezıdentikke úmitker Tóleýtaı Raqymbekov qyrýar qarjyǵa shetten mal satyp alǵansha, osyndaı baǵyttaǵy sharýa qojalyqtaryna qoldaýdy kúsheıtý kerektigin jıi aıtady.

Osyndaı sharýa qojalyqtary aınaladaǵy eldi meken turǵyndaryn turaqty jumyspen qamtyp, aýyl tútinin óshirmeı otyr. Biraq, sonyń ózinde eki qolǵa bir kúrek tappaı, qalaǵa qaraı sabylyp jatqan jastar kóp. Sondyqtan, aýyl tynys-tirshiligin damytýǵa tyń serpin kerek.