Tóleýtaı Raqymbekov Atyraý oblysyndaǵy sharýa qojalyqtaryn aralap júr

NUR-SULTAN. QazAqparat - «Aýyl» partııasy atynan prezıdenttikke úmitker Tóleýtaı Raqymbekov Atyraý oblysyna sapary barysynda birqatar sharýa qojalyqtaryn aralap, tynys-tirshiligimen tanysty. Bul týraly partııanyń baspasóz qyzmeti habarlady.

Kandıdat sharýalardyń kókeıde júrgen máselelerin tyńdady. Ony sheshýge qatysty usynystaryn aıtty.

Atyraý oblysyndaǵy «Saraıshyq» sharýa qojalyǵy jýyrda eshki sútinen balmuzdaq jasaý bastamasyn qolǵa aldy. Kásiporyn usaq maldan 14 túrli ónim shyǵarady. Prezıdenttikke úmitker Tóleýtaı Raqymbekov istiń jaı-japsarymen tanysyp, memlekettik baǵdarlamalardy tıimdi qoldaný tetikterine toqtaldy.

Kandıdat Atyraý oblysyndaǵy alma baǵy sharýashylyǵynda da boldy. Munda bas-aıaǵy 160 gektar aýmaqqa 40 myń túp aǵash otyrǵyzylǵan. Tóleýtaı Raqymbekov saılaýaldy baǵdarlamasyn tanystyryp, dıqandardyń suraqtaryna jaýap berdi.