Tóleýtaı Raqymbekov: Ákim saılaýy – evolıýtsııalyq damýdyń bir satysy
«Men keshe ǵana qyzmettik issapardan keldim. Batystaǵy oblystarǵa baryp, sondaǵy aýyl turǵyndarymen kezdesip qaıttym. Árıne, aýyldarda problema degen kóp. Ol bárimizge belgili. Aýyzsý, jol, ınternet, bilim berý, densaýlyq saqtaý sapasy qalaǵa qaraǵanda óte tómen ekenin aıtyp jatyr. Sol kezdesýlerde men aýyldaǵy aǵaıynǵa óz oıymdy aıttym. Bul bir jaǵynan aýyl halqyna óz taǵyryn ózi aıqyndaýǵa berilgen múmkindik bolsa, ekinshi jaǵynan úlken jaýapkershilik.
«Buryn aýyldaǵy máseleni nege ákimge aıtpaısyz degende, joǵarydan tapsyrma bolmasa, halyqtyń talabyna qulaq aspaıtynyn alǵa tartatynsyzdar. Al budan bylaı ákimdi ózderińiz saılap alasyzdar. Endi ákim jumys istemeı jatsa, ózgeden kóre almaısyzdar. Óıtkeni ózderińiz daýys bergensizder. Onyń jumys isteýin jaı turǵyn retinde ǵana emes, daýys berýshi retinde talap ete alasyzdar», - dep túsindirdim», - deıdi sarapshy.
Onyń aıtýynsha, aýylda saılaý ótip, halyqtyń saıası belsendiligi oıansa, ondaǵy tirshilik te jandanady.
«Jergilikti ózin-ózi basqarý júıesine ózgeris engizý talpynysyn aýylǵa degen qamqorlyqtyń shynaıy qadamy dep qarastyrýǵa da bolady. Al saılaýdan keıin aýyldarda tirshiliktiń jaqsy nemese jaman jaǵyna ózgerýi naqty saılanǵan ákimderge baılanysty bolady dep esepteımin. Іlgeri ketkenderi durys tańdaý jasaǵanyn túsinse, jaǵdaıy ońalmaǵan eldi mekenderdiń halqy saılaýdy sátti ótkizgen aýyldardan kelesi joly úlgi alatyn bolady. Óıtkeni bir ákimdi saılaǵan soń, birneshe jyl sonyń quzyrynda bolý kerek degen talap joq. Halyqqa saılanǵan ákimniń qyzmetine laıyqtylyǵyn daýysqa salý quqyǵy da berilip otyr», - degen Ulttyq keńes múshesi esimizge halyqtyń «Kósh júre túzeledi» degen maqalyn saldy.
«Bul iste áste asyǵýǵa bolmaıdy. Óıtkeni bizdiń tańdaǵan jolymyz revolıýtsııalyq ózgeris emes, evolıýtsııalyq damý», - dedi Tóleýtaı Raqymbekov.