Tóleýtaı Rahymbekov: Jer sheteldik azamattarǵa satylmaýy ári jalǵa berilmeýi tıis

NUR-SULTAN. QazAqparat - «Aýyl» halyqtyq-demokratııalyq patrıottyq partııasy jer máselesine qatysty ustanymyn bildirdi, dep habarlaıdy QazAqparat tilshisi.

Búgin Ortalyq kommýnıkatsııalar qyzmetindegi baspasóz máslıhatynda «Aýyl» partııasy tóraǵasynyń birinshi orynbasary Tóleýtaı Rahymbekovke «Bizdiń qoǵamdy kópten beri alańdatyp júrgen másele bar. Ol - jer máselesi. Jalpy, «Aýyl» partııasynyń jer máselesine qatysty ustanymy qandaı?» degen saýal qoıylǵan edi.

«Bul, shynymen de, kópten beri búkil halyqty, ár azamatty alańdatyp otyrǵan másele. Bul problema 1992 jyldan bastap qoǵamǵa beligi boldy. Sodan beri ártúrli pikir, qózqaras bar. Bireýler jerdi satý kerek dese, endi biri satpaý kerektigin aıtady. Al «Aýyl» partııasynyń ustanymy - jer sheteldik azamattarǵa satylmaýy ári jalǵa berilmeýi tıis», - dedi Tóleýtaı Rahymbekov.

Osy rette ol: «Jerdiń ózi búgingi kúni ómir súrip jatqan bizderge ata-babamyzdan amanat retinde qalyp otyr. Sony bile otyryp jerimizdi sheteldikterge qalaı satamyz, qalaı jalǵa beremiz? Ata-babamyz soıylmen, shoqparmen júrip qanyn tókken jerdi bireýge satýǵa, tipti jalǵa berýge eshqandaı quqymyz joq», - dedi.