Tóleýtaı Rahymbekov agrarlyq 19 JOO-ny qysqartýdy usyndy

NUR-SULTAN. QazAqparat – Elimizde aýyl sharýashylyǵy salasyn kadrmen tolyq qamtý úshin qazirgideı 22 emes, 3 agrarlyq ýnıversıtet jetkilikti. Ulttyq qoǵamdyq senim keńesiniń múshesi Tóleýtaı Rahymbekov keńes otyrysynda osylaı dedi, dep habarlaıdy QazAqparat tilshisi.

«Argentına, Brazılııa, Izraıl sekildi elder ınnovatsııany keńinen qoldaný arqyly aýyl sharýashylyǵy salasynda naqty jetistikterge qol jetkizdi. Nátıjesinde osy elder azyq-túlik ımporttaýshylarynan eksporttaýshylardyń álemdik kóshbasshylaryna aınaldy. Qazaqstan da osy elder sııaqty bola alady. Ol úshin aýyl sharýashylyǵyn ǵylymı qoldaýǵa jáne jappaı jumysshylardan bastap joǵary bilimi bar mamandarǵa deıingi kadrlardy daıarlaýǵa erekshe nazar aýdarý qajet. Búgingi tańda oqytý sapasy men oqý bitirgennen keıin jumyspen qamtýdyń tómen deńgeıine qatysty kóptegen syn aıtylady. Bul problemalardy sheshý úshin JOO-lardy profıldeý kerek dep esepteımin. Meniń oıymsha, salany qajetti kadrmen qamtamasyz etý úshin qazirgideı 22 ýnıversıtet emes, úsh agrarlyq ýnıversıtettiń múmkindigi tolyǵymen jetkilikti», - dedi Tóleýtaı Rahymbekov Ulttyq qoǵamdyq senim keńesiniń kezekti otyrysynda.

Onyń aıtýynsha, túlekterdi mamandyǵy boıynsha jumyspen qamtý úshin Prezıdenttiń jeke, qosalqy sharýashylyqtardy damytý týraly tapsyrmasyn iske asyrýǵa - tutastaı aýyl sharýashylyǵy ónimin óndirýshilerdiń kooperatsııasy múmkindik beredi.

«Kooperatıvter aýyldy damytýdyń áleýmettik, ekonomıkalyq jáne saıası negizi bola alady», - dedi ol.