Tóleýbek Aralbaıdyń Almatyda «Teatr álemine saıahat» dep atalatyn benefısi ótedi

dep habarlaıdy QazAqparat.

Semeı qalasynda temirjolshy otbasynda ómirge kelgen ol oqýshy kezinde-aq Pıonerler saraıynyń drama úıirmesine qatysty. Mektep qabyrǵasynda júrip Semeı oblystyq mýzykalyq drama teatry janyndaǵy stýdııada bilim alyp, S. Júnisovtiń «Ajar men ajal» pesasy boıynsha qoıylǵan spektaklde Oljataı rólin oınaıdy. Stýdııany bitirgen soń teatrdyń qazaq tobyna qabyldanyp, M. Kárimniń «Aı tutylǵan túninde» Aqjigit, Shteınniń «Talasynda» Ivan Pozdnyshev, Q. Muhamedjanovtyń «Komıssar Ǵabbasovynda» podporýchık jáne taǵy basqa rólderdi somdaıdy. 1973 jyly Qazaqtyń M.Áýezov atyndaǵy memlekettik akademııalyq drama teatry janyndaǵy 2 jyldyq stýdııaǵa túsip, teatrda O.Bókeevtiń «Qulynym meniń» dramasynda Jigit, L.Pırandellonyń «Ógeı qyzynda» Saıqymazaqty oınaıdy. 1975 jyly stýdııany R. Seıtmetovtiń synybynda bitirip, Kórkemdik keńestiń sheshimimen teatrǵa akter bop jumysqa qabyldanady. Árqıly komedııalyq, dramalyq jáne tragedııalyq keıipkerlerdi jan-jaqty ashyp kórsete alǵan oǵan 1985 jyl «Ǵasyrdan uzaq kún» qoıylymynda Edige róli úshin Ortalyq Azııa teatrlarynyń Tashkentte ótken І Halyqaralyq teatr festıvalinde «Er adam rólin úzdik oryndaǵany úshin» júldesi beriledi. Sondaı-aq teatr qabyrǵasynda júrip Temirbek Júrgenov atyndaǵy Óner akademııasyn «Drama jánge kıno rejısseri» mamandyǵy boıynsha qyzyl dıplommen bitirip shyqty. Onyń rejısserlik debıýti Kókshetaý oblystyq drama teatryndaǵy T. Qajybaıdyń «Úkili Ybyraı» qoıylymy boldy. Budan keıin oblystyq teatrlarda birneshe spektakl qoıyp, 1997 jyly M.Áýezov teatrynda «Álı baba jáne qyryq qaraqshy» 2 bólimdi mıýzıklin sahnalady. Qazirgi tańda E. Obaevpen shyǵarmashylyq birlestikte qoıǵan «Syǵan serenadasy» (I.Saparbaı) mıýzıkli, «Qara kempir»(Á.Ámzeev), «Úmit úzgim kelmeıdi» (N.Kelimbetov) dramalary tear sahnasynda tabysty júrip jatyr.

Qazaqstannyń eńbek sińirgen artısi, «Qurmet» ordeniń ıegeri Tóleýbek Aralbaı kıno ónerinde, teleserıaldarda árqıly keıipkerlerdi ómirge ákeldi.