Tóleý merzimi 90 kúnnen asqan mıkrokredıt somasy 45 mlrd teńgege jetti – agenttik

NUR-SULTAN. QazAqparat – Elimizde tóleý merzimi 90 kúnnen asqan mıkrokredıtter somasy 45 mlrd teńgege jetti. Bul týraly QR Qarjy naryǵyn retteý jáne damytý agenttigi tóraǵasynyń mindetin atqarýshy Nurlan Ábdirahmanov málim etti, dep habarlaıdy QazAqparat tilshisi.

«Búgingi tańda Qazaqstanda 246 mıkroqarjy uıymy, onyń ishinde onlaın formatta 50 AEK-ke deıin mıkrokredıt berýdi ǵana júzege asyratyn 25 kompanııa jumys isteıdi. Sonymen qatar, osy jylǵy 1 sáýirdegi jaǵdaı boıynsha MQU jalpy somasy 318 mlrd teńgege tutynýshylyq kredıtter berdi. Qaryz alýshylar sany 1,2 mln adamdy qurady. Onyń ishinde jalpy somasy 103 mlrd teńgege 50 AEK-ke deıingi mıkrokredıtter berildi. Qaryz alýshylardyń sany - 811 myń adam», - delingen Nurlan Ábdirahmanovtyń Májilis depýtattarynyń saýalyna bergen jaýabynda.

Onyń dereginshe, 50 AEK-ke deıingi tóleý merzimi 90 kúnnen asqan mıkrokredıtterdiń deńgeıi 45 mlrd teńgeni qurady jáne merzimi ótken mıkrokredıtter boıynsha qaryz alýshylardyń jalpy sany 388 myń adamǵa jetti. 50 AEK-ke deıingi mıkrokredıtter boıynsha problemalyq bereshektiń ortasha deńgeıi 66 myń teńgeni qurap otyr.

«Qazirgi ýaqytta mıkroqarjylyq qyzmet týraly zańda mıkrokredıtterdiń 2 túrin berý kózdelgen: 56 paıyzǵa teń jyldyq tıimdi syıaqy mólsherlemesinen aspaıtyn mólsherleme boıynsha 20 000 aılyq eseptik kórsetkishten (61 260 myń teńge) aspaıtyn mólsherde; kúntizbelik 45 kúnge deıingi merzimge 50 aılyq eseptik kórsetkishten (153 150 teńge) aspaıtyn mólsherde mıkrokredıt kezeńine belgilenetin 25 paıyzǵa deıingi mólsherleme boıynsha. Mıkrokredıttiń ekinshi túrin negizinen onlaın kredıtteý kompanııalary jeke tulǵalarǵa tek tutynýshylyq maqsattarǵa nemese shuǵyl qajettilikterge, qamtamasyz etýsiz jáne jeńildetilgen rásimmen qashyqtan qyzmet kórsetý formatynda beredi. Álemde mundaı mıkrokredıtter keń taralǵan jáne «PDL – Pay Day Loan» jalaqyǵa deıingi qaryzdar retinde belgili», - dedi ol.