Tóleshovtiń tárkilengen kólikteri búgin elektrondyq satylymǵa shyǵaryldy
ShYMKENT.QazAqparat - Toqtar Tóleshovtiń tárkilengen kólikteri búgin elektrondyq satylymǵa shyǵaryldy. Rolls-Royce pen Bentley markaly avtokólikterdi búginde Ońtústik Qazaqstan memlekettik múlik jáne jekeshelendirý departamenti gosreestr.kz saıtyna satýǵa qoıyp otyr, dep habarlaıdy «QazAqparat HAA tilshisi.
Atalǵan saıttyń elektrondyq saýda alańyna sottalǵan Tóleshovtiń tórt kóligi shyǵarylyp otyr.
Olardyń qatarynda: 1992 jylǵy Mitsubishi GT, 2005 jylǵy Rolls-Royce, Bentley men jol tańdamaıtyn 2006 jylǵy GMC kólikteri bar. Máselen, Mitsubishi GT bastapqy baǵasy 1 083 myń teńge bolsa, aýktsıonǵa qatysý úshin bastapqy kepil jarnasy - 162 450 teńge bolyp belgilengen. Al, Bentley kóliginiń bastapqy baǵasy 13 703 000 teńge bolyp tur. Saýdaǵa qatysqysy keletin adam aldymen 2 055 450 teńge tóleýi tıis. Rolls-Royce kóliginiń baǵasy 40 150 000 teńgeden bastalady. Bastapqy kepil jarnasy 6 022 500 teńgeni quraǵan. Jol talǵamaıtyn GMC kóliginiń alǵashqy baǵasy 6 527 000 teńge bolsa, elektrondy saýdaǵa qatysý úshin - 979 050 teńge tóleý qajet.
Aıta keteıik, sot úkimimen tárkilengen kólikter buǵan deıin memlekettik nemese zańdy tulǵalardyń qaramaǵyna ótýi tıis bolǵan. Alaıda qos taraptan da qyzyǵýshylyq bolmaǵan soń, elektrondyq satylymǵa shyǵarylyp otyr. Ońtústik Qazaqstan memlekettik múlik jáne jekeshelendirý departamenti qaramaǵynda burynǵy syra zaýyty qojaıynynyń taǵy toǵyz kóligi bar. Olarǵa da memlekettik nemese zańdy tulǵalardan suranys bolmasa, osylaı satylymǵa qoıylýy múmkin.
«Aýktsıon saǵat 11.00-de bastaldy. Ol keshke deıin jalǵasatyn bolady. Qosymsha bul kólikter boıynsha komıssııa taǵy qarap sheshim shyǵarady. Satyp alýshylar jóninde aqparatty keshkisin habarlaıtyn bolamyz», - dedi Ońtústik Qazaqstan memlekettik múlik jáne jekeshelendirý departamentiniń bastyǵy Murat Sábdenov.
Eske salaıyq, Astana qalalyq qylmystyq ister jónindegi aýdanaralyq mamandandyrylǵan əskerı soty «Shymkentsyra» zaýytynyń burynǵy basshysy Toqtar Tóleshovti 21 jylǵa sottaı otyryp, onyń 30 iri qara mal (onyń 11-i asyl tuqymdy), eki túıe, Túrkistan men Ońtústik Qazaqstan oblysynda ornalasqan jer telimderi; «Mıttsýbısı», «Toıota», «Bentlı», «Shevrole», «Toıota Land Krýzer 200», BMW, «Mersedes» markaly kólikteri, «Shevrolet» markaly toǵyz kólik, «Porsh Kaıen», «Toıota Kamrı», Vw Passat, «Toıota Prado», «Infınıtı», «Toıota Kamrı» mashınalary men 2011 jylǵy Rolls-Royce pen 2015 jylǵy Leksýs-250 kóligin tərkilegen bolatyn. Sondaı-aq zergerlik buıymdar jasaıtyn 22 nysan men Tóleshovtiń tórt áıeliniń bank kartalaryndaǵy aqsha, 183 dana zergerlik əshekeı buıymdary da memleket paıdasyna ótken edi.
