Tóleshovtiń isine qatysty 25 advokattyń bári «qupııalyq» týraly tilhatqa qol qoıǵan
ASTANA. QazAqparat - Bılikti kúshpen basyp alýǵa árekettendi dep aıyptalyp otyrǵan Toqtar Tóleshevtiń isindegi 25 fıgýranttyń advokattary (25 advokat - agenttik) sot aıaqtalǵansha is barysyna qatysty eshqandaı kommentarıı bermeý týraly tilhatqa qol qoıdy. Bul týraly QazAqparat tilshisine sot otyrysynyń úzilisinde fıgýranttardyń biri, ıaǵnı, «Shymkentsyra» zaýyty dırektorynyń orynbasary bolǵan Vıktor Rýlevskııdiń advokaty Asanbek Berdibekov málim etti.
«Qylmystyq ister jónindegi mamandandyrylǵan aýdanaralyq áskerı sotta qaralyp jatqan Toqtar Tóleshov pe basqalardyń sotyna qatysyp jatyrmyn. Men «Shymkensyra» zaýyty dırektorynyń orynbasary bolǵan Vıktor Rýlevskııdiń advokatymyn. Sottyń búgin birinshi kúni. Sot bastalmaı turyp sýdıa bul istiń jabyq, qupııa túrde ótetinin eskertti. 25 fıgýranttartyń advokattarynyń barlyǵy is barysyna qatysty kommentarıı bermeý týraly tilhatqa qol qoıdyq. ıAǵnı, qandaı da bir kommentarıı berýge bizdiń quqymyz joq», -deıdi A.Berdibekov.
Biraq, bul advokat óziniń qorǵaýyndaǵy V.Rýlevskııdiń kinási bar degenge senbeımin deıdi.
« Qorǵaýshy bolǵannan keıin, óz qorǵaýymdaǵy adamnyń kinási dáleldengen joq dep esepteımin. Sebebi, men 2016 jyldyń naýryzynan beri osy iske qatysyp kele jatyrmyn. Onyń naqty kinási bar degenge áli kózim jetken joq. Bul meniń pikirim, prokýrordyń oıy bólek, sýdıanyń oıy bólek»,-dep qysqa qaıyrdy A.Berdibekov.
A.Berdibekovtiń aıtýynsha, aty shýly qylmystyq is 300 tomnan turady, 150-ge jýyq kýáger suralady. Sondyqtan, sot keminde 2-3 aıǵa sozylýy ábden múmkin deıdi ol. Sot otyrysy kúnde saǵat 10.00-18.00 aralyǵynda ótedi.
Toqtar Tóleshov «Shymkentsyra» zaýytynyń burynǵy ıesi edi. 2016 jyldyń qańtarynda Shymkentte kúsh qurylymdary arnaıy operatsııa júrgizip, ony qolǵa túsirgen bolatyn. Arada alty aı ótken soń, ıaǵnı, maýsym aıynda ulttyq qaýipsizdik komıteti resmı málimdeme jasaı otyryp, Toqtar Tóleshovke qarajaty men laýazymyn paıdalana otyryp, bılikti kúshpen basyp alýǵa árekettendi degen aıyp taqty. Bul oıyn júzege asyrý úshin Toqtar Tóleshov quzyrly organdar men áskerı saladaǵy vedomstvolardan sybaılastar tapqan eken. Jalpy, osy qylmystyq iste 25 fıgýrant bar.
