Tóleshov - transulttyq qylmystyq qaýymdastyq ókili

Naqty aıtqanda, ol «Bratskıı krýg» transulttyq qylmystyq qaýymdastyǵymen tyǵyz qarym-qatynas ortanyp, onyń kóshbasshylary men bedeldi múshelerine qarjylaı kómek kórsetip otyrǵan. Bul týraly búgingi baspasóz máslıhatynda Ulttyq qaýipsizdik komıteti baspasóz qyzmetiniń ókili Rýslan Karasev habarlady.

Tergeý nátıjesinde T. Tóleshovtiń «Ded Hasan» degen laqap atpen esimi málim bedeldi qylmyskermen, Georgıı Sorokınmen (laqap aty «Jora Tashkentskıı»), Gafýr Rahımovpen (laqap aty «Chernyı Gafýr»), Nozın Jumaevpen (laqap aty «Maksım Býharskıı»), Іlııas Sultanovpen (qylmys álemindegi laqap aty «Dıadıa Ilıas») turaqty qarym-qatynasta bolǵany anyqtalǵan. UQK men ІІM-niń qyzmetkerleri quramyna engen vedomstvoaralyq jedel tergeý toby T. Tóleshovten atalǵan tulǵalarǵa turaqty túrde iri kólemde qarajat aýdarylyp otyrǵanyna bultartpas dálelder taýypty.

Tergeýden málim bolǵany, T. Tóleshov G. Rahımov pen N. Jumaevtyń tikeleı qatysýymen jáne kómegimen Ózbekstandaǵy birqatar kommertsııalyq nysandardy ıelenedi. Buǵan mysal, «Shorlyq» qonaq úıi, boıaý-syrlaý zaýyty, «Lázzat» kondıter fabrıkasy, sondaı-aq, shymkenttik kásipker «Ýzpromstroıbanktiń» iri aktsıonerleriniń qataryna kirgen. Atap aıtarlyǵy, T. Tóleshov Qazaqstanda «Shymkentsyra» JShS-niń dırektory ǵana emes, quramyna shyny shyǵaratyn zaýyt, «Shymkent pıkchers» kınostýdııasy, ońtústikqazaqstandyq agrarlyq odaq jáne birqatar basqa nysandar kirgen «Darhan» iri holdınginiń de qojaıyny ekeni anyqtaldy. Holdıngtiń Reseı, Qyrǵyzstan, Tájikstanda fılıaldary bar.

Rýslan Karasevtiń aıtýynsha, T. Tóleshovtiń Shymkent qalasynyń aýmaǵynda «Hasan ata», G. Sorokın, G. Rahımov jáne t.b. qatysýymen birneshe ret jıyn ótkizgeni beınetaspaǵa jazylypty. Óziniń qarjylaı kómegine aıyrbas esebinde «Syra koroli» atanǵan kásipker Ońtústik Qazaqstan oblysynyń qylmystyq ortasyna yqpal etýge qol jetkizedi. Oǵan qosa, zańsyz jolmen aqsha jınaıtyn jáne qylmystyq daýlardy sheshetin jetekshi top qalyptastyrady.

Tergeýden málim bolǵany, T. Tóleshov óziniń qylmystyq menmendigin iske asyryp, bedelin ósirý maqsatymen óz kásiporyndarynyń kúzet qyzmetiniń bazasynda qarýlanǵan uıymdasqan qylmystyq top quryp, oǵan basshylyq etedi. Top quramynda baqaıshaǵyna deıin muzdaı qarýlanǵan, tıisti oqý-jattyǵýdan ótken jaýyngerler ustaǵan. Áskerılendirilgen quramdy syrttaı zańdy etip kórsetý úshin áýeli ony «Smej», keıin «Vympel grýpp» degen kúzet fırmasy retinde tirkeıdi. Anyqtalǵandaı, uıymdasqan qylmystyq toptyń qajetine dep Tóleshov ózine baǵynyshty adamdardyń kómegimen oq atatyn qarý, jarylǵysh zattar satyp alady. «Kásiporyndarynda jáne basqa nysandarda júrgizilgen tintý jumystarynyń nátıjesinde 10-nan astam oq atatyn qarý, áskerı granatalar, trotıldi jarylǵysh zattar jáne iri kólemde oq-dáriler tabyldy. Buǵan qosa, Tóleshovtiń qylmystyq tobynyń qaramaǵynda kúzet fırmasynyń atyna tirkelgen 60-tan astam qyzmettik qarý bolǵan»,- dep málimdedi R. Karasev.

Osy top T. Tóleshovtiń tikeleı buıryǵymen adam urlaý, zańsyz bas bostandyǵynan aıyrý, adam janyn azaptaý, adam óltirý, bireýdiń múlkin qasaqana joıý sııaqty aýyr jáne asa aýyr qylmystardy júzege asyrady. Adamnyń janyn azaptaý, qorlaý kórinisteri foto jáne beınetaspaǵa túsirilip otyrǵan. Baspasóz máslıhatynda osyndaı fotosýretter kórsetildi. Tintý barysynda tárkilengen bul aıǵaqty materıaldar qylmystyq iske qosa tigilip, al fotosýrettegi adamdar sotqa jábirlenýshi retinde qatysady. Tergeýden dáleldengenindeı, Tóleshov óz bandasynyń qajetine qyrýar aqsha shyǵyndaǵan. Onyń jıyntyq kólemi 200 mln. AQSh dollarynan asyp túsken. Aıtarlyǵy, ol qylmystyq tobynyń qyzmetin esirtki, qarý-jaraq saýdasynan, reıderlik jáne t.b. qylmystardan túsken qarajatpen iske asyrǵan. Eske túsirsek, 30 qańtarda Shymkentte arnaıy operatsııa kezinde ustalǵan Tóleshovtiń úıi men jumys ornynan qarý-jaraq, esirtki zattary, oqý quraldary tárkilendi.

Aıta ketelik, UQK T. Tóleshovke qatysty qylmystyq istiń negizgi epızodtary boıynsha tergeý aıaqtalǵanyn habarlady. Atalǵan qylmystyq istiń sheńberinde 25 adam qylmystyq jaýapkershilikke tartylyp, 300-ge jýyǵy kýáger retinde ótýde.