Tóleshov sot úkimi shyqqaly beri UQK tergeý abaqtysynda otyr - qorǵaýshy Marhaba Jaqypova
ShYMKENT. QazAqparat - Shymkent syra zaýytynyń burynǵy qojaıyny Toqtar Tóleshov sot úkimi shyqqaly beri UQK-nyń Ońtústik Qazaqstan oblysyndaǵy tergeý abaqtysynda otyr. Aqpan aıynan beri túrmege jiberilmegen. Alaıda sottalýshymen týystary jolyǵa almaı keledi. Bul týraly búgin Eńbekshi aýdandyq sotynda suhbat bergen qorǵaýshysy Marhaba Jaqypova málimdedi, dep habarlaıdy QazAqparat HAA tilshisi.
Qorǵaýshy Marhaba Jaqypova búgin sot otyrysyna Tóleshovtiń týystarynyń ótinishi boıynsha kelgenin aıtty. Onyń sózinshe qorǵaýshysynyń advokat jaldaýǵa qarajaty joq. Sebebi, múlkin tárkilep alǵan soń, múldem qarjysyz qalǵan. Sondaı-aq Marhaba Jaqypova Toqtar Tóleshovtiń qazirgi jaǵdaıy týraly da baıandap ketti.
«Jaǵdaıy qalypty. 21 jylǵa sottalǵan adamnyń jaǵdaıyn túsinýge bolady ǵoı. Abaqtyda jatqanda oǵan úsh ret medıtsınalyq kómek shaqyrtylǵan. Birinshisinde tisi aýyrsa, ekinshi jáne úshinshi jaǵdaıda bel omyrtqasy mazalaǵan. UQK-niń tergeý abaqtysyna aryz-shaǵymy joq. Jalǵyz ózi bir kamerada otyr. Ázirge túrmege jiberilmedi. Ol jaǵy sheshiletin shyǵar. Oǵan týystary jiberilmeıdi, aǵasy da qansha ýaqyttan beri kire almaı otyr. Oǵan ruqsatty endi sýdıadan surap kóremiz. Bazbireýler basynda jarasyn baıqadyq deıdi. Basy eshqandaı da jaraqattanbaǵan», - deıdi qorǵaýshy Marhaba Jaqypova.
Degenmen sot otyrysy kezinde Toqtar Tóleshovtiń kóńil kúıi kóterińki jaqsy bolǵany baıqaldy. Ol aıyptalýshy retinde sotqa kelgen burynǵy áriptesteri men Eńbekshi aýdandyq Memlekettik kirister basqarmasynyń qyzmetkerlerine kúlip amandasyp, sóılesip te aldy. Alaıda sottalǵan Tóleshovpen sóıleskender sot hatshysynan eskertý aldy.
Qorǵaýshy sondaı-aq Tóleshovtyń qyzmetkerleri men burynǵy advokaty Evgenıı ıAvorskıı qazir oǵan qarsy aıyptaýlar aıtyp jatqanyn aıtty.
«Avokat ıAvorskıı qazir oǵan qarsy aıyptaý jaýabyn bergen Sábıt Aldabergenovtyń qorǵaýshysy bolyp otyr. Bul bylaısha qaraǵanda advokattyq etıkaǵa jatpaıdy. Ol negizinde bul iske aralasýdan bas tartýy kerek edi. Ol alǵashqy sotta da Tóleshovke qarsy shyǵyp,kýáger retinde jaýap bergen bolatyn», - deıdi qorǵaýshy.
Eske salaıyq, buǵan deıin elde lańkestik tóńkeris jasamaq boldy dep 21 jylǵa sottalǵan Toqtar Tóleshovke endi ekonomıkalyq qylmystar boıynsha aıyp taǵylýda. Ol qylmystardy jasaýǵa qolǵabys etken taǵy segiz adam da sotqa shaqyrtyldy . Olardyń arasynda Shymkent qalasyna qarasty Eńbekshi aýdandyq Memlekettik kirister basqarmasynyń tórt qyzmetkeri de bar.
