Tóleshov isi boıynsha sot protsesiniń merzimi belgili boldy

ASTANA. QazAqparat - Astanada bılikti kúshpen basyp alýǵa tyrysty degen aıyppen ustalǵan belgili kásipker Toqtar Tóleshovke qatysty qylmystyq is Astana qalasy mamandandyrylǵan áskerı sotqa kelip tústi. Bul týraly áskerı sottyń qylmystyq ister boıynsha appelıatsııalyq alqa májilisiniń tóraǵasy Jandos Musabekuly málim etti.

Onyń aıtýynsha, T. Tóleshovtiń isi sotqa 29 tamyzda kelip túsken.

"5 qyrkúıekte ótken aldyn ala tyńdaý qorytyndysy boıynsha, is sot óndirisine qabyldanyp, basty sot talqylaýy 2016 jyldyń 14 qyrkúıegine saǵat 10:00-ge taǵaıyndaldy", - dedi J. Musabekuly.

Aıta keteıik, atalǵan is aıasynda 25 tulǵa qylmystyq jaýapkershilike tartylyp, 300 adam kýálar retinde ótedi.

 Tergeý barysynda T. Tóleshovtyń birqatar aýyr jáne asa aýyr qylmystar jasaýǵa qatysy bar ekendigi anyqtalǵan. Onyń qylmystyq áreketi QR QK 1997 jylǵy redaktsııasyndaǵy 125 baby (adam urlaý), 126 baby (adamdy zańsyz erkindiginen aıyrý), 179 (Bılikti basyp alýdy nemese ustap turýdy nasıhattaý  nemese oǵan jarııa túrde shaqyrý, sol sııaqty bılikti basyp alý nemese ustap turý ne Qazaqstan Respýblıkasynyń konstıtýtsııalyq qurylysyn kúshtep ózgertý), 182 (Ekstremıstik top qurý, oǵan basshylyq etý nemese onyń áreketine qatysý), 262 (Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý), 265 (Transulttyq qylmystyq qoǵamdastyq qurý jáne oǵan basshylyq etý, sol sııaqty oǵan qatysý), 286 (Qylmystyq toptyń áreketin qarjylandyrý, sol sııaqty múlikti saqtaý, bólý, qarjylandyrý arnalaryn ázirleý), 268 (bandıtızm), 287 (Qarýdy, oq-dárilerdi, jarylǵysh zattardy jáne jarylys qurylǵylaryn  zańsyz ıemdený, berý, ótkizý, saqtaý, tasymaldaý nemese alyp júrý), 296 (Esirtki, psıhotroptyq zattarmen, sol tektes zattarmen, prekýrsorlarmen ótkizý maqsatynsyz zańsyz jumys isteý) jáne 367 (para berý), sondaı-aq 96 bap (adam óltirý), 107 (qınaý) jáne 187 (Bótenniń múlkin qasaqana joıý nemese búldirý) baptarymen aıqyndalady. Barlyǵy T. Tóleshov 16 qylmys boıynsha aıyptalýda.

Sondaı-aq T. Tóleshov basqarǵan qaraqshylar onyń nusqaýymen birqatar qylmystar jasaǵan, olardyń arasynda adam óltirýge oqtalý, adam urlaý, adamdy zańsyz erkindiginen aıyrý, qınaý, qaraqshylyq, bótenniń múlkin qasaqana joıý nemese búldirý syndy qylmystar bar. 

Sondaı-aq tergeý T. Tóleshov pen onyń birqatar sybaılastary bılikti kúshpen basyp alýǵa, onyń ishinde QR aýmaǵynda birqatar áleýmettik shıelenis oshaqtaryn uıymdastyryp, jappaı tártipsizdikter men narazylyq aktsııalaryn uıymdastyrýǵa daıyndyq jasaǵanyn anyqtady.