«Toleranttylyq - birge ómir súrý óneri» atty fotoóner kórmesi ashyldy

Kórmege 50 avtordyń túrli janrdaǵy 100 jumysy qoıylǵan. Sondaı-aq, fotopeızajdar men portretterdi de tamashalaýǵa bolady. Máselen, O. Ionovtyń "Úndistan-Qazaqstan", I. Petrakovtyń «Taǵylymdylyq», K. Mıýırdiń «Báıterek: Qazaqstan rýhyn sezin» fotojumystary avtorlardyń pozıtsııasy men Qazaqstannyń áleýmettik, mádenı jáne qazirgi ómirin kórsetedi. Sonymen qatar, fotosýretshilerdiń ishki qumaryn sporttyq sıýjetterden de kórýge bolady. Munda sýretshiler sezimnen túńilýge deıingi, muńaıýdan qýanysh-shattyqqa deıingi adamǵa tán búkil emotsııany tolyǵymen bergen. Ony F. Saıfýllınniń «Márege jaqyn qaldy», «Ekpin», A. Rahymovanyń «Meje» atty túsirilimderinen baıqaýǵa bolady. Olardyń jumystarynyń sıýjetteri ómirdiń qyzyǵy men shattyqqa bólengen optımızmge toly. Sýretshilerdiń aıtýynsha, túsirilgen ár bir sát - qaıtalanbas sátke aınalady.

"Fotosýretshilerdiń eń jaqsy kóretin taqyryptarynyń biri - anımalızm, olar onda kóbinese jylqyǵa aıryqsha kóńil bóledi. Fotosheberler arǵymaqtardy sporttyq jarysta, alaman báıgede, «Kókpar» oıynynda kez kelgen qyrynan kórsete bilgen. Olardy V. Gorbýnovtyń «Kókpary» men «Báıgesinen», L. Chernovtyń «Jigitterinen» tamashalaýǵa bolady",-dedi Ortalyq kórme zalynyń dırektory Ásel Ómirshına. Onyń aıtýynsha, dáldikti beınelilikpen ushtastyrý sııaqty sırek beriletin qasıet kórmege qatysqan árbir sýretshiniń boıynda bar.

Shara barysynda baıqaýdyń kórkem jáne shyǵarmashylyq qoǵamdastyq ókilderinen quralǵan qazylar alqasy jumystardy iriktep, «Kásipqoı», «ıÝnıor jáne áýesqoı» kategorııalary boıynsha baıqaý jeńimpazdaryn anyqtaıtyn bolady. Eń myqty degen týyndylardyń avtorlary arnaıy dıplomdarmen marapattalady.