Tólenbegen qaryzyńyz bolsa, shetelge shyǵa almaısyz
ASTANA. KAZINFORM — Sot ákimshiliginde boryshkerlerdiń elden tys jerlerge shyǵýyna baılanysty túıtkildi máseleler talqylandy.
Іs-sharaǵa Bas prokýratýranyń, Ádilet jáne Densaýlyq saqtaý mınıstrlikteriniń, Ulttyq qaýipsizdik komıteti Shekara qyzmetiniń, Jeke sot oryndaýshylary respýblıkalyq palatasynyń ókilderi, oblystyq jáne oǵan teńestirilgen sottardyń azamattyq ister jónindegi sot alqalarynyń tóraǵalary, Sot ákimshiligi aýmaqtyq departamentteriniń basshylary qatysty.
Іs-sharany ótkizýge atqarýshylyq qujattar boıynsha boryshkerlerdiń Qazaqstannan tysqary jerlerge shyǵýyna ýaqytsha shekteýlerdi toqtata turý týraly sot oryndaýshylarynyń qaýlylaryna sottardyń sanktsııa berý praktıkasyn taldaý nátıjeleri arqaý boldy.
Ádette, 147 myń teńgeden (40 AEK) 3 aıdan astam ótelmegen qaryzy barlarǵa jol júrý shekteledi.
Shetelge shyǵýǵa shekteýlerdiń toqtatylýynyń jalǵyz sebebi - shetelde emdelý qajettiligi.
Taldaý nátıjeleri kórsetkendeı, bıylǵy 10 aı ishinde sotqa jiberilgen 1768 qaýlynyń 867-si nemese árbir ekinshisine sanktsııa berýden bas tartylǵan.
Ruqsat berýden bas tartý shetelde emdelý qajettiligi týraly dálelderdiń bolmaýyna jáne óz elinde emdelý múmkindiginiń bolmaýyna baılanysty. Mysaly, tize jaraqatyn emdeýge sheteldik emhananyń shaqyrýynan basqa aýrýdy shetelde emdeý qajettiligi týraly medıtsınalyq qujattar usynylmaǵandyqtan, sot sot oryndaýshysynyń boryshkerdiń júrýine ýaqytsha shekteýdi toqtatý týraly qaýlysyna sanktsııa berýden bas tartqan.
Sot oryndaýshylary zańda kózdelmegen negizder boıynsha (qyzmettik issaparlar, jarystarǵa qatysý, jaqyn týystaryn jerleý jáne t.b.) jol júrýge ýaqytsha shekteýlerdi toqtatý týraly qaýlylar shyǵarý jaǵdaılaryna jol bergen.
Boryshkerler emdelý úshin elden tys jerlerge shyǵýǵa negiz retinde Qazaqstanda sátti emdelip jatqan jıi kezdesetin aýrýlardy (osteohondroz, gastrıt, artrıt, pýlpıt jáne t.b.) kórsetken. Bul jaǵdaıǵa Qazaqstanda emdeýge arnalǵan tıisti tehnologııalar men jabdyqtar joq aýrýlar tizbesiniń joqtyǵy yqpal etip otyr. Toqtatý merzimi de rettelmegen.
Sonyń saldarynan boryshkerler óz quqyqtaryn jıi paıdalanyp, memleket bıýdjeti men alımentterdi qosa alǵanda, ótelmegen mıllıondaǵan bereshegi bar, olarǵa qatysty qoıylǵan shekteýler men tyıymdardy «aınalyp ótedi».
Sonymen qatar, memlekettik organdardyń boryshkerlerge qatysty aqparat almasý júıeleri bir-birimen jetkilikti túrde biriktirilmegen.
Bul másele de sot oryndaýshylaryna berilgen qujattardyń oryndalýyn baqylaýǵa múmkindik bermeıdi.
Talqylaý qorytyndysy boıynsha osy saladaǵy kemshilikter men olqylyqtardy joıý jóninde keshendi usynymdar ázirlenip, ýákiletti organdarǵa joldandy.
