Tólenbegen aıyppuldary bar júrgizýshilerge memlekettik qyzmetter shektelýi múmkin
ASTANA.KAZINFORM – Іshki ister mınıstrligi kólik júrgizýge medıtsınalyq qarsy kórsetilimderi bar tulǵalar týraly aqparat alatyn bolady. Tıisti norma jol qozǵalysy qaýipsizdigin tsıfrlandyrý máseleleri jónindegi zań jobasyna engizilgen.
Atap aıtqanda, zań jobasynda medıtsınalyq derekterdi ІІM-niń avtomattandyrylǵan júıesine biriktirý usynylady. Bul kólik quraldaryn basqarýǵa medıtsınalyq qarsy kórsetilimderi bar adamdardy jibermeý maqsatynda qolǵa alynbaq. Mundaı jaǵdaılarda tıisti dıagnoz qoıylǵan sátten bastap júrgizýshi kýáliginiń kúshi ýaqytsha toqtatylady.
Sonymen qatar jol qozǵalysy qaýipsizdigi salasynda tólenbegen aıyppuldar nemese olardy tóleý týraly nusqamalar bolǵan jaǵdaıda birqatar memlekettik qyzmetterdi alý shekteledi.
Budan bólek, zań jobasy quqyq buzýshylyqtardy avtomatty túrde tirkeý júıesin keńeıtýdi kózdeıdi. Bul avtojoldarda jáne memlekettik organdardyń kólikterinde, jedel járdem qyzmetinde, sondaı-aq turaqty jolaýshylar tasymalyn júzege asyratyn tasymaldaýshylarda ornatylatyn tehnıkalyq quraldar arqyly jol qozǵalysy qaýipsizdigin baqylaýdy kúsheıtýge baǵyttalǵan.
Aıta keteıik, elimizde jol-kólik oqıǵalarynyń aldyn alý jáne joldaǵy tártipti kúsheıtý maqsatynda josparly túrde aýqymdy profılaktıkalyq reıdtik sharalar turaqty túrde ótkizilip keledi.
