Tólem kartasyn alǵan qazaqstandyqtar sany rekordtyq kórsetkishke jetti

NUR-SULTAN. QazAqparat – 2021 jylǵy 1 qańtardaǵy jaǵdaı boıynsha QR-da aınalymda 48 mln tólem kartasy boldy, bul ótken jyldyń sáıkes kezeńimen salystyrǵanda (32 mln) 49,7%-ǵa kóp. Sońǵy úsh jylda aınalymdaǵy kartalar sany jylyna orta eseppen 35,7%-ǵa ósýde. Tıisinshe, osy kartalardy ustaýshylardyń da sany artýda. Máselen, 2020 jyly kórsetkish 31,6% -ǵa, ıaǵnı 39,2 mln-ǵa kóbeıgen, dep habarlaıdy QazAqparat ranking.kz-ke silteme jasap.

Búginde árbir eresek qazaqstandyqqa (16 jastaǵy jáne odan joǵary) tórt tólem kartasy tıesili, bul qashyqtan banktik ınfraqurylymdy turaqty jańǵyrtýǵa suranysty qamtamasyz etedi. Bul kórsetkish boıynsha Almaty kósh bastap tur. Munda árbir turǵynda orta eseppen 9 karta bar. Sonymen qatar, Nur-Sultannyń ár turǵynyna 6 kartadan keledi. Tólem kartalary jáne tıisti ınfraqurylym búkil halyqty, onyń ishinde eldiń shalǵaı óńirlerindegi halyqty tsıfrlyq qyzmettermen qamtýǵa múmkindik beredi.

Qazaqstan aýmaǵynda halyqaralyq jáne jergilikti tólem kartalyq júıeler jumys isteıdi. Aınalymdaǵy kartalardyń negizgi úlesi — 67%-dan astamy Mastercard jáne VISA halyqaralyq tólem júıelerine tıesili. Halyqaralyq tólem júıeleriniń ónimderi men servısterin paıdalaný karta ustaýshylarǵa álemniń kez-kelgen núktesinde tólemder jasaý múmkindigin usynady.

2020 jyly tólem kartochkalaryn paıdalaný arqyly jalpy somasy 35,3 trln teńgege 2,9 mlrd qolma-qol aqshasyz tranzaktsııa júrgizildi. Bir jyl ishinde qolma-qol aqshasyz tólemder kólemi birden 2,4 esege ósti.

2020 jyly COVID-19 pandemııasy qolma-qol aqshasyz tólem formatyna kóshýge aıtarlyqtaı áser etti.

QR aýmaǵynda 2020 jyly qolma-qol aqshasyz operatsııalardyń negizgi úlesi, atap aıtqanda, qolma-qol aqshasyz tólemderdiń jalpy kóleminiń 81,4%-yn onlaın-ótkizdi. Búgingi tańda eldegi 20 bankte iOS jáne Android júıelerin paıdalanýshylar úshin mobıldi bankıng qyzmeti bar. Bir jyl ishinde bankterdiń onlaın-servısterin paıdalanýshylar sany 45,8%-ǵa, ıaǵnı 28,7 mln-ǵa deıin ulǵaıdy. Bir jyl buryn 19,7 mln paıdalanýshy bolǵan.